Brasiliami nuna sisoormat 68-it ajunaarput
Atomip nukinganik atortussangortitsiviit marluk matuneqarallarnissaat, Rio de Janeirop kujasissortaani Angra dos Reisip borgmesteriata eqqarsaatersuutigaa.
- Atomip nukinganik atortussanngortitsivinni ajornartorsiortoqanngilaq, nunalli sisoorneranik ajoqusersinnaanissaat aarlerinarmat matuneqartariaqarsinnaapput, borgmesteri Tuca Jordao nutaarsiassaqartitsivimmut Ritzauimut oqarpoq.
Aqquserngit Angra dos Reisip tungaanut ingerlaartut nunap sisoornerata kingunerisaanik ilaatigut matuneqarsimammata, illoqarfiup innuttaasui 35.000-usut imaaliallaannarlugit qimagutitinneqarsinnaanngitsut aamma oqaatigineqarpoq.
- Illoqarfissuaq Rio de Janeirop innaallagissamik allamiit pilersorneqarpoq, atomillu nukiliorfimmiit pilersorneqarani, nukiliorfimmiit oqaaseqartitap nalunaarutigaa.
