Brasiliami inupiluit naalagaajartuinnartut

Brasiliamukassaagut, tassa Brasiliami illoqarfissuit nakuusernernit pinerluttuliornernillu ima atuiffiutigilersimapput, allaat inuit illoqarfissuarni najugallit inuttut pisinnaatitaaffii navianartorsiortinneqarlutik.

Inupiluit sakkulersorlutillu akiuuttartut illoqarfinni aqutsisunngorsimasut, nalunaarusiami nutaami oqaatigineqarpoq.

Brasilia tusaraangatsigu kiinarpalerluni eqqumiitsunillu atisalersorluni qitinneq sissarlu sioqqanit qaqqorissunit qallersimasoq eqqaasarpavut. Kisianni sissat alianaatsorsuit illorsuillu portusuut tunuatungaanni pissutsit sakkortuut atugaapput.

Amnesty International nalunaarusiami nutaami allappoq, Brasiliami illoqarfissuit annerpaat Rio De Janeiro aamma Sao Paulo tassaalersimasut nakuuserniartartut naalagaaffigilersimasaat, ikiaroornartuerniat ataatsimoortut oqartussaaffii, inupiluusertartullu sakkutuutut aaqqissuussat ingerlatsivigisaat.

Ukiut kingulliit ingerlanerini pissutsit ajorsiartuinnavissimapput. Piitsut najugaqarfii eqqugaanerpaapput, taakkumi inupiluusertartut politiillu akersuunnerisa qeqqanniikkamik. Sumi tamaani eqqaassinerit, aneqqusaannginneq, politiiusimasut sakkutuujusimasullu aaqqissuussamik inupiluuserlutik akiliisitsiniartut imaaginnavipput.

Politiit kisitsisit saqqummiussaat tunngavigalugit oqaatigineqarpoq, siorna inuit tuusintit sinnillit politiinit toqunneqarsimasut.

Amnesty Internationalimit oqaatigineqarpoq naalakkersuisut isumannaatsuunissaq isumagisinnaajunnaarsimagaat.

Nalunaarusiami oqaatigineqarpoq pisortat isumannaatsuunissaq qulakkeerniartariaqaraat, nakuusernermullu patsisaasut qulaajarlugit.

Tamatumunnga taarsiullugu maanna Riop Guvernøria nakuuserneq iliuuseqarfiginiarlugu sakkutuunik ikiortissarsiorsimavoq.