Brasiliami eqqissiviilliortorsuupput
Amerikami kujallermi naalagaafferujussuarmi Brasialiami eqqisiviilliornerit maannamut sakkortunersaat akunnerup naanerani pisimavoq. Illoqarfissuarmi Sao Paolomi inuit 52-it toqunneqarsimapput, pinerluttut, politiit parnaarussivinnilu paarsisut aporaannerini amerlaqataat ikiligaasimapput.
Eqqissiviilliorneq tallimanngormat aallartippoq, pinerlunniat illoqarfissuarmi Sao Paolomi politeeqarfiit, nakkutilliisoqarfiillu 100-nik sinnillit saassummatigik.
Pinerlunniat qullersarisaata, parnaarussaaqataatalu 700-nit sinnillit parnaarussivimmut isumannaallisakkamut nuunneqarneranni eqqissiviilliortoqalerpoq. Naalagaaffiup immikkoortuani Sao Paolomi parnaarussivinni 36-ni parnaarussat paarsisitik, pulaartullu 250-inik amerlanerit tigusaraat.
Pikitsitsiniaqatigiit parnaarussivinni atugassarititaasut ajorluinnartut naammagiunnaarlugit ataatsimoorfitsik PCC pilersissimavaat, parnaarussanillu ilissarsiortuartarlutik. Brasiliap præsidentiata Lula da Silvap pinerlunniat ajornartorsiutaanerarpai:
-Ajornartorsiut qaangerniarutsigu ilinniartitsineq, atuartitsinerlu aqqutissaapput, Brasialiap præsidentia Lula da Silva nassuerpoq.
PCC Brasiliami nunanilu eqqaaniittuni pikitsitsiniat saamerliunerusut siunertaannik sunnerneqarlutik ikiaroornartunik, sakkunillu tuniniaanernik, inunnillu aallarussinernik aningaasarsiuteqarput.
Parnaarussat parnaarsussivinnut immikkut isumannaallisakkanut nuuneranni eqqissiviilliortoqassangatinneqarsimavoq, ilimagineqarsimanngilarli taamak sakkortutigissasoq.
