Brasiliami eqalussuarnik aalisapiluttut unnerluutigineqarput

Taamaattumik avatangiisinik illersuiniaqatigiinnit, aalisakkanik qalerualinnillu tunisassiortut, Aasiami pisisartutik pisiassaqartinniaannarlugit, inatsisinik unioqqutitsillutik eqalussuarnik 300.000-it angullugit amerlassuseqartunik pisaqartarmata unnerluutigaat.

Taamatut eqalussuarnik aalisapilunneq, avatangiisinik illersuiniaqatigiit pinngortitami ataqatigiinnermut aserorsaataasutut taavaat, taamaattumillu suliffeqarfiup eqalussuarniarnermik ingerlatallip, 4,5 milliardit koruuninik akiliisinneqarnissaa piumasaralugu, eqqartuussivimmut tunniullugu.

- Eqalussuarniarnerup pinngortitami ataqatigiinnermut qanoq sunniuteqartiginera naatsorsorparput, avatangiisinik illersuiniaqatigiit siuttuat Cristiano Pacheco, nutaarsiassaqartitsivimmut AP-mut oqarpoq.

Taassuma oqaatigaa, eqalussuit amerlanersaat sulussugutaajaannariarlugit immamut iginneqartartut. Tamannali eqalussuit toqqutigisaraat oqaatigalugu.

Kiinamiut niuertut eqalussuit sulussugutaannik akisunaaqalugit akileerusussuseqarnerat, unioqqutitsilluni eqalussuarniartarnermut pissutaanerarneqarpoq.