Brasiliami dommerit kalaallit marluk
Nunatsinni assammik arsartarneq nunani allanit maluginiarneqartorujussuuvoq. Assammik arsarluni Amerika tamakkerlugu pissartanngorniunneq ataasinngorpat septemberip ulluisa tallimaanni Brasiliami aallartinneqarpat, inuusuttuaqqat assammik arsartartut U18-it nunanut allanut unammisartui, peqataasussaapput, taakkuli saniatigut dommerit kalaallit marluk aamma ilaassapput.
Dommerit peqataasussat tassaapput Poul Olsen, Sisimiuniit aamma Jensinguaq Kristensen Aasianneersoq. Taakku marluk nunatsinniit siullersaallutik peqataassapput.
- Poul Olsen Jensinnguaq Kristensenilu dommeriusarnerminni Nunarsuaq Tamakkerlugu Assammik Arsartartut Kattuffianni, IHF-imi, ilitsersuisunit maluginiarneqarnermik kingorna, Brasiliami pissartanngorniunnissami dommeriusussatut qaaqquneqarput. Brasiliamiinnerminni nalilersorneqassapput, ingerlalluassagunillu nunani allani unammersuarnerit ingerlanneqaraangata peqataanissaminnut periarfissaqalersinnaasut, Assammik arsartartut Kattuffianni siulittaasoq, Palle Jeremiassen oqarpoq.
Brasiliami unammersuarnermi arnat angutillu peqataasussaapput, unammersuarnerillu U18-imi unammisartunut aamma tassaapput Nunarsuarmi pissartanngorniunnernut anngunniunnerit.
