Mexicop kangerliumanersuani uuliamik maqisoornerujussuup kingorna 53-inik ukiullip Tony Haywardip aqutsinera isornartorsiorneqangaatsiareersorlu soraarsitsineq pivoq.
Tony Hayward Sibiriamuartinneqassasoq aviisimi Politikenimi allaaserineqarpoq, uuliasiortitseqatigiiffiup BP-p Ruslandimi immikkoortortaasa ilaanni pisortanut nuimavallaanngitsunut ilanngutissalluni.
Robert Dudley BP-mi pisortanngussasoq, nutaarsiassaqartitsivimmi Ritzauimi allaaserineqarpoq. BP-mi annaassiniartutut juunilli qiteqqunnerani Robert Dudley akisussaasuusimavoq.
Uuliasiortitseqatigiiffissuup BP-p Tuluit Nunaanni illoqarfiit pingaarnersaanni, Londonimi, orsussaarniarfiutai tamaasa avatangiisinik illersuiniaqatigiit Greenpeace-ikkut matusimagaat, aviisimi Jyllands-Postenimi ullaaq manna allaaserineqarpoq.
Jyllands-Postenimi allaaserineqarpoq orsussaarniarfiit silataanni Greenpeace allagartalersuisimasoq allassimasunik "matoqqavoq. Uulia akuiagaanngitsoq qimatserparput, orsersortarfinniillu benzinamik orsersortoqarsinnaannginniassammat attataasamik aamma ikkussisimapput.