BP maqisuunnginnermini sipaarniarsimavoq

Uuliasioqatigiiffissuup BP-p aningaasanik sipaaniarnerat pisooqataalluni, Mexicop Kangerliumanersuani siorna aasakkut uuliamik maqisoorput. Taama paasititsipput Det Hvide Husimi amerikamiut paasiniaanerminni ataatsimiisitaliarsua.

Nalunaarusiap inerniliussaani allassimavoq, USA-p oqaluttuarisaanerani uuliarluernermik aatsaat taama annertutigisumi, BP-p isumannaalisaanermi atortorissaarutai amigaateqarsimasut.

- Siunertarisamut naleqqukkaluarpalluunniit, taamaattoq BP-p suleqataasalu, Halliburtonip aamma Transoceanip aningaasatigut piffissamillu atuilluarniarnerminni aalajangiineri amerlavallaaqaat. Tassalu tamannarpiaq pissutaalluni uuliami qillerivimmi isumannaallisaaaneq appariartinneqarsimavoq, nalunaarusiami ilaatigut taama allassimasoqarpoq.

Qillerivimmi ajutoornermi uulia nappartat 5 millionit naligi imaanut maqivoq, aatsaallu qaammatit tallimat qaangiummata qilleriviup aseqqua matuneqarluni.