BP Issittumut suliartungajalerpoq
Tuluit uuliasiortitseqatigiiffiat, BP, russillu uuliasiortitseqatigiiffiat, naalagaaffimmit nakkutigineqartoq, Rosneft, Siberiap avannarpasissuata imartaani, Karahavimi, milliardit koruunerpassuit nalingannut uuliasioqatigiinnissaminnik tallimanngormat isumaqatigiipput.
Piginneqataassutinik suliffeqarfissuit taakku marluk akornanni paarlaatnnikkut isumaqatigiissut piviusunngorpoq, Issittumilu uuliaqarluarfiusuni BP maanna sulisinnaanngorpoq, russit kisimik maannamut taamaaliorsinnaatitaasimagaluartut.
Uuliamik qillerivissuaq Deepwater Horizon Mexicop Kangerliumanersuani siorna qaarmat, uuliamik aatsaat taama annertutigisumik ukiuni nutaanerusuni ajunaartoqarujussuarpoq, BP-lu tassani akisussaasuuvoq, taamaammallu suliffeqarfissuup taassuma suleqatiginissaa russinit suli pilerigineqarnerulersimagunarpoq.
- Mexicop Kangerliumanersuani uuliakoortoqarujussuarnerata kingorna saliinermik BP misilittagaqarlualerpoq, Ruslandimi ministeriunerup tullersortaa, Igor Sechin, tallimanngormat oqarpoq.
Igor Sechin isumaqarpoq, misillernermi kingorna BP isumannaallisaanermik nakkutiginninnerulersimassasoq.
BP-mit paasissutissat naapertorlugit Karahavip imartaani nappartanik milliarderpassuarnik uuliaqarlunilu gasseqarpoq.
Suliffeqarfissuit taakku suleqatigiinnissaat ilaatigut Greenpeacemit akerlerineqarpoq:
- Issittumi uuliasiornissamut akuerineqartunit BP kingullerpaasariqarpoq, taassumami akuersissummik pinissaa kalaallit naalakkersuisuisa siorna itigartippaat, suliffeqarfissuit taakku suleqatigiinnissaat nalunaarutigineqarmat Greenpeace-mit oqaaseqartartoq, Ben Stewart, oqarpoq.
