BP aningaasateqarfimmut milliarderpassuarnik aningaasaliissaaq
Washingtonimi præsidentip illorsuani Det Hvide Husimi BP-p qullersai Amerikamiullu præsidentiat ataatsimeeqatigeereersullu isumaqatigiissuteqartoqarpoq.
Tamatumunnga peqatigitillugu Obamap siunnersortaasa ilaata ilisimatitsissutigaa, Obama juunip 23-anni Senatimut ilaasortanik pingaarutilinnik Det Hvide Husimut ataatsimiigiaqqusisoq, taamaalilluni Senati silap pissusaanut nukissiuuteqarnermullu nutaamik inatsisiliornissamut piareersimanissaa qulakkeerneqarniassammat.
Obama unnuaq tv-kkut oqalugiarnermini oqarpoq, uuliasioqatigiiffiup BP-p Mexicop Kangerliumanersuani qillerivimmini ajutoornerata kingunerisaanik, USA silap pissusaanut nukissiuuteqarnermullu politikkiminik nalilersueqqittariaqartoq.
Obamap Senatimut ilaasortat inatsisissatut siunnersuummut tapersersuilersissinnaagunigit, silap pissusaanut nukissiuuteqarnermullu inatsit nutaaq qulakkeersinnaassagaluarpaa. Tassami inatsisissatut siunnersuut Repræsentantarnes Husimi akuerineqareermat.