Bostonimi ullumi aperujussuassaaq

Timmisartut 100-likkaat USA-mi akunnerit 24-t kingulliit ingerlaneranni eqqorneqarput, inuit tuusintilikkaat juullikkunni angallannerannik eqquilluni.Nutaarsiassaqartitsivik Ritzau taama allaaserisaqarpoq.

Silaannakkut angallanneq Europami pitsanngoriartulersorlu USA-mi pissutsit ajorsiartorput.

Inuit 100-likkaat aqqutissaarullutik Parisip Bruxellesillu timmisartoqarfiini unittooqqapput.

Amerikamiulli tassa massakkut ajornartorsiulerput.

USA-p kangimut avannarpasinnerusortaa silarlummik eqqugaanerpaajunissaa ilimagineqarpoq, assersuutigalugu Boston eqqorneqarnerlussangatinneqarluni.

Silapiluk USA-p kangimut sineriaa atuarlugu avannarpartissangatinneqarpoq, aperujussuassangatinneqarluni.

USA-p pisortatigoortumik silasiorfia taama nalunaaruteqarpoq.

Aamma Ruslandimi ajornartorsiortoqarpoq. Moskvami illoqarfiup ilaani innaallagiaarunneqarpoq, aqqusernillu sermersimammata quatsissimaqalutik. Innuttaasut 10 millioniusut isersimaannaqquneqarput, aatsaallu pisariaqarluinnassappat angallannissaat borgmesterip oqaaseqartartuata kajumissaarutigaa.

- Biilernanga qimuttuitsornissara pilersaarutigigaluarpara, qimuttuitsulli aamma ingerlanngillat, Moskvami innuttaasut ilaat tv-qarfimmut NTV-mut oqarpoq, Moskvami aqqusernit sukuutsertarfissuarmut assersuullugit.

Silap issilertarlunilu issaasattaqattaalertarnera aammalu nataqqornartaqattaarnera pissutaalluni ajornartorsiutit pilersinneqartut oqaatigineqarpoq.