Bosse: Tele-Post inummik nukittuumik pisortaqartariaqarpoq
Tele-Posti politikerit piumasaattut namminersortunngortinneqassappat, taava suliffeqarfik ingerlalluartussaavoq, aningaasarissaarluni, atuisunut attaveqarluarluni suliffeqarfimmilu sulisut pitsaasumik aallunneqarluarlutik.
Tele-Postimi pisortaaninngortussaq, Savalimmiormiu Kristian Reinert Davidsen atorfinitsinneqareersorlu, Tele-Postip siulittaasua, Stine Bosse taama oqarpoq.
- Kalaallit Nunaanni attaveqaatit pillugit suliffeqarfissuup siuarsarneqarnissaanut, Kristian peqataassaaq. Tele-Posti suliffeqarfittut pissaganartuuvoq siunissaq eqqarsaatigalugu periarfissarissaartoq, Stine Bosse oqarpoq.
Aamma atuaruk Tele-Post Savalimmiormiumik pisortartaarpoq
Savalimmiormiu 48-nik ukiulik, Kristian Reinert Davidsen, Savalimmiut attaveqaatit pillugit suliffeqarfissuanni, Føroya Telemi maanna atorfeqartoq, januaarip aallaqqaataani 2016-imi kingusinnerpaamik atorfinitsinneqassaaq.
Nukittuumik ilisimasaqarluartumillu pisortaaneqalissaaq
Tele-Postimi pisortaanerusimasup, Michael Binzerip siorna ukiakkut atorfimminit soraarnissani aalajangiuppaa, suliffeqarfissuup siulersuisuinik suleqateqarnerup eqarpallaarnera pissutigalugu, tamatumalu kingorna pisortaanerit taarseraapput soorlu aamma siulersuisut allanik taarserneqartut.
Tamakkorpiaallu ilaatigut pissutigalugit, suliffeqarfik nukittuumik ilisimasaqarluartumillu pisortaanermik atorfissaqartitsisoq, Stine Bosse oqarpoq.
Aamma atuaruk Suleqatigiinnikkut ajornartorsiuteqarsimaneragaaneq Agner Markip ilisarinngilaa
- Kristiaap suliassaasa pingaarnerit ilagissavai suliffeqarfiup pitsaasumik aqunneqarnissaa. Tassami suliffeqarfiit qullersatigut ajortumik ingerlanneqaraagata taava suliffeqarfik unittoortarpoq, Stine Bosse oqarpoq.
Tele-Posti politikerit piumasaattut namminersortunngortinneqassappat, taava suliffeqarfik arlalitsigut pitsaasumik ingerlalluartussaasoq, Stine Bosse aamma oqarpoq.
- Politikerit piumasaat anguneqassappat, taava suliffeqarfik ingerlalluartussaavoq, aningaasarissaarluni, atuisunut attaveqarluarluni suliffeqarfimmilu sulisut pitsaasumik aallunneqarluarlutik, Tele-Postip siulittaasua, Stine Bosse taama oqarpoq.
Aamma atuaruk Stine Bosse Tele-Postimi siulittaasunngortoq
Kristian Reinert Davidsenip paarlassavaa, KNR-ip pisortaanerisimasaa, Søren Lennert Mortensen, taanna pisortaanerugallartup, Steen Montgomery-Andersenip, siulersuisunik suleqatigiissinnaannginneq pillugu tunuarniuteqartup paarlattaa.