Bosniamiut pisuutinneqarput
Nunat tamat eqqartuussivianni Haagimi ullumi immikkuullarissumik aalajangiunneqarpoq, Bosniamiut Serbiamiittut inuiannik toqoraasimasutut pisuutinneqartut, ukiut aqqaneq marluk matuma siornagut Srebrenica-mi musliminik 8000-inik toqoraagamik.
Peqatigisaanilli eqqartuussiviup aalajangiuppaa naalagaaffik Serbia, Bosnien-Herzegovina-mi innuttaasut imminnut sorsuunneranni inuiannik toqoraanermut eqqartuussisutigut akisussaasuunngitsoq.
1990-ikkunni taamanikkut Jugoslaviaasumi innuttaasut sorsuutilerneranni qanorpiaq susoqarsimanersoq ima oqaluttuarineqarpoq.
1992-imiit 95-imut Bosniami sorsuunneq Sorsunnersuit Aappaata kingornatigut aatsaat taamak Europami aammik kuisiffiutigaaq.
Sorsunneq aallartinneqarpoq, inuiaat assigiinngitsut pingasuusut ilaat marluk Serbiami qitiusumik ingerlatsinermit avissaarnissamik kissaateqalermata tamannalu inuit 100.000-it inuunerannik akeqarpoq. Serbiap imaluunniit taamanikkut Jugoslaviap sorsunneq innuttaasut imminnut sorsuunnerattut isigaa. Sorsuttut tassaallutik Bosniamiut Serbiamiittut Jugoslaviamut ataannarusuttut illuatungaanilu Kroatiamiut muslimillu Jugoslaviamit avissaarusuttut. Illuatungaani Bosniamiut oqarput Serbiamiut innuttaasut akersuuteqqullugit kajumissaarisimasut. Serbiap Serbiamiut Bosniamiittut sakkunik pilersorsimagai aamma toqoraanermi peqataasimanerarlugu, taamaalillutik naalagaaffik Serbia angisooq pilersissinnaajumallugu.
Bosniap ukiut 13-it matuma siornagut – sorsunneq suli ingerlagallarmat – Serbia eqqartuussisunut tunniuppaa, ilaatigut inuiannik toqoraaneq unitsikkusullu ilaatigullu Serbiamit taarsiiffigitinnissaq anguniarlugu. Taamanikkut Jugoslaviamit, Slobodan Milosevic-imit eqqartuussivimmut suliassanngortitsineq unitsinniarneqarpoq, oqartoqarluni FN-imi eqqartuussivik taamatut suliaqassallunin piginnaatitaaffeqanngitsoq.
Kisianni nunat tamat akornanni eqqartuussiviup suliassap misilinneqartariaqarnera aalajangiusimavaat. Ilaatigut tassaniippoq sorsunnermut ajortulianut eqqartuussivik. Tassanilu ilaatigut Jugoslaviap naalagarsuarisimasaa Slobodan Milosevic eqqartuussivimmut unnerluutigineqarpoq, sulili eqqartuussaanani parnaarussaanermi nalaani toquvoq. Sakkutooqarnermili nuimanerusut marluk Bosniami inuiannik toqoraasimasutut pisuutitaapput.
Sorsunnermi pinerluuteqarsimasunut eqqartuussiviup Haagimiittup ullumi aalajangiiffigaa, naak Serbiamiut taamanikkut siuttuisa Srebrenica-mi inuiannik toqoraaneq unitsissimasinnaagaluaraat, Serbia Bosniami inuiannik allanik toqoraanermut ullumikkut pisuutinneqarsinnaanngitsoq.
Serbia pisuutinneqarsimasuuppat Bosniamiut muslimit milliardikkaanik taarsiiffigeqqusimassagaluarput.
