Boris Johnson partiimini siulittaasutut ministeriunertullu tunuartoq
![](/sites/default/files/styles/image_934x467/public/article_images/20220707-103448-l-3872x2581ma.jpg?itok=X13EfDwT)
Boris Johnson tuluit konservatiiviisa partiianni Det Konservative Partimi siulittaasutut atuutilertortumik tunuarpoq, partiilli taassuma nutaamik siulittaasortaarnissaata tungaanut ministeriuneruinnarallassalluni, Boris Johnson oqarpoq.
Taanna ministeriunertut Londonimi Downing Street 10-mi najugaqarfimini ullumi sisamanngornermi oqalugiarami taama oqarpoq.
- Det Konservative Partimit inatsisartuni ilaasortat paartiiminni nutaamik siulittaasortaarusuttut nutaamillumi ministeriuneqalissasoq kissaatigigaat ersarippoq.
- Nutaamik siulittaasussarsiortoqalereerpoq, taanna oqarpoq.
Nutaamik siulittaasoqalernissaata tungaanut ministeriuinnarallassalluni, taassuma ilanngullugu oqaatigaa.
Det Konservative partimi oktobarimi ataatsimeersuassapput. Tuluit konservatiivi oktobarimi nutaamik siulittaasortaasoqalissasut nutaamillumi ministeriuneqalissasoq ilimagineqarpoq.
Det Konservative Partimi aasap ingerlanerani ukiassariartulerneranilu siulittaasunngorniuttoqassaaq. Johnsonilu paarlallugu kina ukiaruna ministeriuninngussanersoq tamatuma ersersikkumaarpaa.
Illersornissamut ministeri Ben Wallace Boris Johnsonimut taartissatut piukkunerusaavoq.
Ben Wallace ministeriuninngorniaqataassappat piukkunerusaasut ilagilluinnaraat, YouGovip Det Konservative Partimi ilaasortat isumaannik paasiniaanerani ersertoq, nutaarsiassqartitsivik Reuters allappoq.
Boris Johnsonip qaammatini tulliuttuni ministeriuinnarallarnissaa, illuatungiliuttut partiiannit Labourimit naammagineqanngilaq.
Konservatiivit namminneq tunuaqqunianngippassuk piaarnermik nutaamik ministeriuneqalernissaa anguniarlugu Labourikkut tatiginninnginnermik inatsisartuni taasititsiniarput.
AAMMA ATUARUK BBC: Boris Johnson ministeriunertut tunuarniarpoq
Boris Johnson nutaanik naalakkersuisoqalertoq ullumi sisamanngornermi nalunaarutigaa, tunuarnissanilu tamatuma kingunitsianngua aamma uppernarsarlugu. Paarlanneqarnissami tungaanut naalakkersuisuugallartoqarnissaa qulakkeerniarlugu taamaaliorpoq.
Boris Johnson, 2019-mi aasakkut ministeriuninngortoq, ulluni kingullerni marlunni isornartorsiorneqangaatsiarpoq.
Naalakkersuisuugallartussat Boris Johnsonip suli suaarutiginngikkai, ministerit ministerillu tullersortaat ilaat 50-init ikinnerunngitsut Boris Johnsonimut akerliullutik tunuarput Johnsonillu tunuarnissaanik kajumissaarlugu.
Tuluit naalakkersuisuisa siulittaasuata saniatigut 20-nik ministereqarpoq ministerillu tullersortaat 99-iullutik. Tassa tuluit katillutik 120-nik ministereqarput.
Boris Johnson mamianartulianik qaammatini kingullerni nalaanneqarnini pissutigalugu piffissami kingullermi isornartorsiorneqangaatsiartarpoq.
Inatsisartunut ilaasortaq, kinguaassiuutitigut innimiilliorsimasorineqartoq Chris Pincher mamianartulianik nalaanneqarneranut ilaavoq. Tamanna Chris Pincherip inatsisartuni ilaasortatut tunuarneranik kinguneqarpoq.
Boris Johnson Pincherimik partiip malittarisassaanik sukannersumik eqquutsitsinissamik qulakkerisartussatut februaarimi atorfinitsitsisimanini pillugu marlunngormat utoqqatserpoq.
Pincher kinguaassiuutitigut innimiilliorsimasorineqarneranik ilisimatinneqareeraluarluni Johnson taamaaliorpoq.
Coronavirusillu tuniluutileruttorneranilu killilersuisoqarnerani ministeriunerup najugaani katerittoqartarsimanera Johnsonip mamianartuliaanut aamma ilaavoq.