Boris Johnson ministeriuninngorpoq

Storbritanniap ministeriunissaa tulleq Boris Johnson-imik ateqarpoq.

Det Konservative Partiip ilaasortai 160.000 missaanniittut taasisinneqareermata inernera marlunngormat pisortatigoortumik nalunaarutigineqarmat tamanna erseqqissumik paasinarsivoq.

55-inik ukiulik Boris Johnson, siornatigut nunat allat pillugit ministeriusimasoq brexitimullu tapersersuinerpaanut ilaasoq konservativinut siulittaasutut misteriunertullu nutaatut qinigaavoq unammillertini massakkut nunat allat pillugit ministeriusoq Jeremy Hunt ajugaaffigalugu.

Boris Johnson 92.153-init taaneqarluni erseqqilluinnartumik ajugaavoq. Jeremy Hunt 46.656-init taaneqarpoq. Partiimut ilaasortat taasisinnaatitaasut 87,4 procentii taasipput.

Theresa May juunimi tunuarpoq

Boris Johnson pisortatigoortumik pingasunngorpat ministeriunertut atuutilissaaq. Theresa May  7. juuni pisortatigoortumik tunuarnissaminik nalunaartoq taarsissavaa.

Tuluit inatsisartuisa Underhus-ianni brexit pillugu isumaqatigiissusiami akuerisaanissaanik arlaleriarluni taasisitsereerluniluTheresa May tunuarpoq.

Taasinerit iluatsinngitsoorput, taamaattumillu massakkut Boris Johnsonip tuluit europamiut suleqatigiiffiannik inuulluaqqusinissaat aquttuuffigisussanngorpaa. Siumoorluni oqareerpoq Tuluit Nunaat EU-mit pilersaarutit malillugit kingusinnerpaamik 31. oktoberi anissasoq – isumaqatigiissuteqartoqarpat imaluunniit isumaqatigiiissuteqartoqanngikkaluarpat.

Theresa May partiip siulittaasuatut juunimi tunuarmalli Londonimi borgmesteriusimasoq atuuffimmut piukkunneqarnerpaasimavoq nunat allat pillugit ministeri Jeremy Hunt-imit piukkunneqarnerulluni, dr.dk taama allappoq.

EU-mut erseqqissumik isorinnittutut isummertarnermigut partiimi ilaasortaasunik avissaartuutsisarpoq, ullullu kingulliit ingerlanerini ministerit arlallit nalunaarput Boris Johnson partiimut siulittaasuussappat ministeriunerussallunilu taava tunuartariaqarlutik.

Boris Johnson nammineq siorna aasakkut nunat allat pillugit ministeritut tunuarpoq Theresa Mayip EU-mik isumaqatigiinniarnermi kingunerisaanik pilersaarutaanut akerliunini tunngavigalugu, dr.dk allappoq.