Boris Johnson: Corona allatut iliuuseqarfigineqarsinnaasimagunaraluarpoq
Coronap ajornartorsiortitsinera allatut iliuuseqarfigineqarsinnaasimagaluartoq, tuluit ministeriunerata, Boris Johnsonnip, nassuerutigalugu tallimanngormat oqarpoq.
Coronap ajornartorsiutaanerata iliuuseqarfigineqarnera misissuiffigineqalissasoq, Boris Johnson neriorsuivoq.
Taannami sakkortuumik peqqinnissaqarfimmit coronap qanoq iliuuseqarfigineqarsimaneranut tunngatillugu sakkortuumik isornartorsiorneqarpoq.
Tuluit nunaanni coronap tuniluutilerneraniit inuit 45.000-it coronamik toqquteqartutut nalunaarsorneqarput, peqqinnissaqarfiillu sakkortuumik isornartorsiuinermini ilaatigut nunarsuup sinneranut sanilliullugu nunap iluani arriippallaartumik matusiniartarnerit isornartorsiorpai.
Tuluit nunaat sapaatip akunnernik ataatsimik sioqqutsilluni nuna matusimagaluaruniuk inuit coronamik toqquteqartut affaannaasinnaasimassagaluartut naalagaaffimmi immikkut ilisimasalik naliliivoq.
Tuluit nunaanni inatsit nutaaq ippassaq tallimanngornermi atuutilerpoq. Coronap siaruatsaaliornissaa anguniarlugu pisiniarfissuarni, niuerfinni nerisassanik annissassanik pisiniarfinnilu qanermut assiaquteqartalernissaq inatsisaalerpoq.