Boris Jeltsin toquvoq

Ruslandimi siusinnerusukkut præsidentiusoq Boris Jeltsin toqusimavoq. Kreml-imiit oqaaseqartitaq ullumikkut taama nalunaaruteqarpoq.

Jeltsin 76-inik ukioqarluni toqusoq, Ruslandip præsidentiatut marloriarluni qinigaavoq.

Præsidentiunermi nalaani piffissami kingullermi uummallulluni peqqinngissuteqartarpoq.

Ruslandimiorpassuit Jeltsin nersorniartarpaat, kommunistit aqutsinerat taamaatimmagu, Ruslandilu Sovjetunioniusimasumit ajutooqqasumit ingerlateqqissinnaammagu.

Taamatulli ikaarsaariartoqarnerata kinguneranik inuppassuit piitsuussusermit eqqorneqarput, demokratiilu eqqunniarlugu sulinermi anngiortumik pisortanik akiliilluni iluaqutissarsiorneq atugaaqaluni.

Nunarsuarmi sumi tamaangaanniit ullumikkut misiginneqatiginnissutinik Rusland nassinneqaqattaarpoq. Washingtonimi Det Hvide Husimit oqaaseqartitap Jeltsin “oqaluttuarisaanermut pingaaruteqartutut” taavaa Jeltsinillu ilaqutaannut Ruslandilu tamakkerlugu misiginneqataanertik nalunaarutigalugu.

Aammattaaq Boris Jeltsinip præsidentitut siulerisaa, Mikhail Gorbatjov, præsidentiusimasup ilaqutaanut misiginneqatiginnissummik nassiussaqarpoq, Berlinillu qarmarsuisa uppitinneqarnerisa kinguneranik pisimasut eqqartorlugit.

Boris Jeltsin Ruslandimi 1991-imiit 1999-imut præsidentiuvoq, præsidentitullu atorfik Vladimir Putin-imut ingerlateqqillugu.