Borgmesteriusimasup assinga qalipagaq tallimanngorpat uleerneqassaaq
Kalaallit Nunaanni naalakkersuinikkut sunniuteqarluartut ilaata, Nuuk kommuneani ukiuni 14-ini borgmesteriusimasup Agnethe Davidsenip assinga qalipagaq Nuuk kommuneata allaffiani persuarsiorfiusumik tallimanngorpat uleerneqassaaq.
Allattoq Louise M. Kleemann
decembarip 17-at 2008 06:56
Agnethe Davidsen ukioq 1989-imi Nuuk kommunalbestyrelseani ilaasortanngorpoq, 1993-imiillu siorna 2007-imi novembarip qaammataani tassanngaannartumik toqussi tikillugu borgmesteriulluni.
Tamanna sioqqullugu naalakkersuisuni isumaginninnermut naalakkersuisutut ilaasortaavoq. Kommunalbestyrelsemi ilaasortaanermini qinigaaffinni marlunni inatsisartuni aamma ilaasortaavoq.
Agnethe Davidsenip assinga qalipagaq Borgmester Nikolaj Heinrichimit uleerneqassaaq. Nikolaj Heinrichip Nuuk Kommuneani borgmesteriunermini pisortatigoortumik suliaasa kingulliit ilagissavaa. Nuup kommunea ukiortaamiit Kommuneqarfik Sermersuumut ilanngutissaaq.
Qalipagaq eqqumiitsuliortumit Aka Høeghimit qalipanneqarpoq.
