Borgmesteriuneqartalernissaq takorloorneqarpoq

Borgmesteriuneq ataaseq, aamma ataatsimiititalianut assigiinngitsunut borgmesterit arlallit, illoqarfimmi najugarisaminnit ingerlatsisut. Kommunit kattussuutereerpata Avannaani kommunersuup taama aaqqissuunneqarnissaa suleqatigiissitat takorloorpaat.

Siunissami kommunersuit qanoq aaqqissuussaanissaat pillugit nunarput tamakkerlugu kommunini ulapputtoqaleruttorpoq. Ulloqeqqanut radioaviisimi Nuummi kommunerujussuarmi inuit ataasiakkaat sunniuteqaqataasinnaanerannut tunngatillugu, illoqarfiit borgmestereqarnissaat oqaluttuaraarput. Avannaata kommunerujussuassaani borgmesterit allatut pilersaarusiorfiginiarneqarput.

Tassani Uummannami ataatsimoorluni ataatsimiittoqareerneratigut suleqatigiinnik aqutsisussanik, kommunersuup nutaap qanoq aaqqissuussaanissaanik siunnersuusiortussamik, pilersitsisoqarpoq. Siunnersuummi borgmesteriuneqalernissaa ilaavoq.

- Borgmesteriunermik illoqarfimmi najugarisamini najugaqaannartussamik qinersissasugut eqqarsaataavoq. Taamatut qinigaasoq assersuutigalugu kommunerujussuarmi illoqarfiit annersaannut pinngitsaalillugu nuutsinneqassanngilaq, Jess Svane suleqatigiissitamut siulittaasuusoq oqarpoq.

Suleqatigiissitat aammattaaq siunnersuutigaat ataatsimiititalianut assigiinngitsunut borgmesterinik pilersitsisoqassasoq.

- Ilaatigut takorloorparput isumaginninnermut borgmestereqassasoq, aalisarnermut borgmestereqassasoq, teknikimut borgmestereqassasoq aamma kulturimut borgmestereqassasoq il.il. aammattaaq taakkua illoqarfigeriikkaminni najugaqaannarsinnaassasut siunnersuutigaarput, Jess Svane oqarpoq.

Suleqatigiissitat aammattaaq illoqarfinni kommunit allaffii pigiinnarusuppaat taakkunanilu pisortat suliffeqarfiutaat katersorusullugit, soorlu Nukissiorfiit, Allakkerisarfik aamma A/S INI.

- Innuttaasut pisortat suliffeqarfiinut assigiinngitsunut orniguteqattaaratik ataasiinnarmik saaffissaqalernissaat angorusupparput, taamaalilluta pitsaanerusumik akikinnerusumillu sullissinissaq angusinnaaniassagatsigu, Jess Svane naliliivoq.

Nuummi kommunerujussuassaq assigalugu Avannaani kommunerujussuassamit siunnersuutigineqarpoq illoqarfiit assigiinngitsut ,ikinnerpaamik ataatsimik kommunalbestyrelsimi ilaasortaatitaqassasut.

Avannaani kommunerujussuassaq pillugu suleqatigiissitaq Aasianni sapaatip akunnerata tulliani ataatsimiissaaq. Ataatsimiinnermi tassani inuussutissarsiutit, takornariaqarneq aalisarnerlu oqaluuserineqassapput.