Borgmesterit Siumumeersut Uldumimut: Naamik, kukkunerunngilaq

- Aningaasaqarnermut Naalakkersuisup Anda Uldumip tusagassiutitigut kukkunerarluta isornartorsiuivoq, Namminesorlutillu Oqartussat aktieselskabiutiminnut piumasaqaateqarnertik ukkataralugu. Tamanna ukkatarissallugu kukkunerulaarpoq, Anda Uldum isumaqarunarmat, aktieselskabit attartornerinut Namminersorlutik Oqartussat Naalakkersuisullu akisussaaffeqanngitsut. Kisianni kukkunerunngilaq, borgmesterit tusagassiorfinnut nalunaaruteqarlutik taama allapput.

- Sapaatimmi akunnerata ingerlanerani Tele paasissutissiivoq, imaatigut kabelimut aningasalersuinissaminnut attartornissaq Namminersorlutik Oqartussat akuersissuteqartussaasut. Aap, ukiup ingerlanerani Tele-p siulersuisuisa siulittaasuat nammineerluni borgmesterinut attuumassuteqartunut marluusunut allagaqarnikuuvoq.

AAMMA ATUARUK Uldum: Borgmesterit isornartorsiutaat kukkuneqarpoq

- Soorluttaaq ilimagineqartoq, politikkikkut pisortaminnit, tassalu Naalakkersuisunit Illut A/S-ip attartornissaani akuersissut Naalakkersuisoqarfimmi akuersissuteqarfigisaraat. Illuut A/S-imimi siulersuisut Namminersorlutik Oqartussani qaffasinnerpaamik atorfilinnit inuttalersugaavoq, aammami taakku Naalakkersuisut aquppaat, ilaa?, borgmesterit aperipput.

- Aammami aktieselskabi Namminersorlutik Oqartussanit tamakkiisumik pigineqartoq akiliisinnaajunnaarnissaa kissaatiginngilarput. Tamanna pillugu kingullermik nalornisoortoqarmat, Namminesorlutik Oqartussat Naalakkersuisullu akuleruteriataarput Royal Greenland-imullu ½ mia. koruuninik nassaarlutik. Tamanna pimmat ajunngilaq, maannakkummi Royal Greenland ingerlalluarpoq. Taamanikkut Namminersorlutik Oqartussat Royal Greenland akiliisinnaajunnaarsissimagaluarpassuk takorluulaariarsiuk.

- Maannakkulli apeqqutaalerpoq, siunissami Naalakkersuisoq Anda Uldum qanoq iliussanersoq, Illuut A/S imaluunniit Nuuk Sikuki Harbour A/S assinganik ajornartorsiulissagaluarpata, borgmesterit taama naggasiipput.