Borgmesterit sakkortuumik uparuaapput

- Aallartinnitsinninngaanniit naalakkersuisuniit inatsisartuniillu ajornartorsiortitaavugut, taamaattumik isumaqarpunga tamanna naalakkersuisut akisussaaffigisariaqaraat, Qeqqata kommuniani borgmesteri Hermann Berthelsen Qanoruumut oqarpoq.

Taamatut oqarnera Kommuneqarfik Sermersuumi borgmesterimit ilalerneqarpoq:

- Kommunerujussuit januaarimi pilersinneqarmata neriorsorneqarnikuusimagaluarpugut qaammatini 16-ini piareersassasugut, kisianni piviusoq unaavoq qaammatit arfineq-pingasuinnaat piffissaralugit piareersarpugut, Asii Chemnitz Narup oqarpoq.

Kommunit ajornartorsiornerat Kujataata Kommuniani borgmesterip naqissuserpaa:

- Ilungersunartumik inissisimavugut, naalakkersuisut ajornartorsiornerput pillugu passitikkusunnaraluaqaat, aamma tapiissutit ilanngarteqqinissaat pinaveersaassagaat neriuutigaara, Simon Simonsen oqarpoq.

- Kommunit aningaasaataannik piiaaniartut qiterivaat aningaasaqarnermut naalakkersuisoq, taannali soorlu kommuninut tunngatillugu oqartussaaffeqarnerusimagunartoq, Hermann Berthelsen oqarpoq.

Kanukokap ataatsimiititsinerani, borgmesterinit pingasunit peqataaffigineqartumi, 2011-mut tapiissutissat kiisalu aningaasaqarnikkut killiffik oqaluuserineqassapput.