Borgmesterit pingasut: Uagut ilisimasaqarneruvugut

Kommunit pingasut borgmesteriisa uteriillutik Assartuineq pillugu isumalioqatigiissitami suleqataanissartik naalakkersuisunut piumasaraat.
Allattoq Oline I. Olsen
marsip 06-at 2010 17:01

- Kommunitsinni angallannikkut pissutsit ilisimanerpaavavut, borgmester Simonsen oqarpoq, Kommuninilu piukkunnaatit atorneqarsinnaasut pillugit ima oqarluni.

- Soorunami uagut kommuneqarfitsinni, nunallu immikkoortuani, angallanikkut pissutsit ilisimanerpaarpaavavut, pisariaqartitat suullu ajornartorsiutaanersut ilisimanerpaallugit, taamaattumik toqqaannartumik ilaasortaatitaqarnissarput kissaatiginartittukuluugaluarparput, borgmester Simon Simonsen oqarpoq.

Kommune Kujallermi borgmesteri Simon Simonsen borgmesterit Hermann Berthelsen aamma Jess Svane Siumumeersut peqatigalugit Assartuineq pillugu isumalioqatigiissitamik uparuaaqqipput. Allakkaminni isumalioqatigiissitami ilaaasortat ilisimasaqarnersut apeqquserpaat. Borgmesterit pingasut ilaatigut ima allapput, issuaaneq aallartippoq:

Anguniagaat pillugit tusarniaanerini akissuteqaataasimasutigut tamatigut inuutissarsiutitigut ineriartortitsinissaq aningaasaqarnikullu imminut napatilernissap amigaataaneri uparuartorneqartillugit, kommunit pineqartut - uagut borgmesteriuffigisavut, allaffissornerup siunissami toqqammaviunissaa tutsuiginngilarput, inuutissarsiutitigulli ineriartortitsinissaq.” Issuaaneq naavoq.

Borgmester Simon Simonsenip kujataani aatsitassarsiornikkut periarfissat anguniakkani taakkartorneqannginneri uparuarlugu, ima tunngavilersuivoq.

- Ukiut tulliuttut tallimat qulillu ingerlaneranni uanga ilimagilluinnarpara arlaatsigut aatsitassarsiorfinnik aallartitsisoqarnissaa, aamma taamaalilluni angallannikkut pisariaqartitsinerit aaqqissuusseqqinnerit naleqqussaanerillu pinngitsoornatik pisariaqartussaammata taamatumik toqqaannartumik ataatsimiititaliamut ilaasortaatitaqarnissarput kissaatiginartutut uanga taasinnaagaluarpara, Borgmester Simon Simonsen oqarpoq.

Kommunit assartuineq pillugu isumalioqatigiissitamut peqataatinneqarnissaat borgmesterinit pingasunit kissaatigineqarpoq.