Borgmesterit marlunnik qinersinissamut ugguartut

Nunatsinni borgmesterit KNR-ip oqaloqatigisaasa marluk kommuninut qineqqusaarneq Inatsisartunut qineqqusaarnermit soqutigineqannginnerussasoq ernummatigaat.
Qeqqata Kommuniani borgmesteri, Malik Berthelsen. Assi © : KNR
februaarip 18-at 2021 04:29

Inatsisartunut kommuninullu apriilip ulluisa arfernganni qinersissaagut.

Taamaattoqarnissaalu borgmesterinut ernumatitsivoq. Borgmesterit marluk kommuninut qineqqusaarnissap soqutigineqannginnerunissaa ernummatigaat.

Qeqqata Kommuniani borgmesteri, Malik Berthelsen (S), qinersinerit ataatsikkoornissaannut pakatsivoq.

AAMMA ATUARUK Nalilersuineq: Urani qineqqusaarnermi eqqartorneqangaatsiassaaq 

- Kommuninut qineqqusaarnerup innuttaasunit immaqa soqutigineqannginnerulluni malinnaavigineqannginnerunissaa eqqoriarsinnaavara. Tamannalu pillugu ugguarpunga, Malik Berthelsen oqarpoq.

Kommunimut qinersinissamut sapinngisamik pitsaanerpaamut pilersaarusiorniarlutik oqarpoq. Inatsisartunulli qineqqusaarnissaq qanoq ingerlassanersoq paaseqqaartariaqarlugu ilanngullugu oqarpoq.

AAMMA ATUARUK Qaqortumi inuit: Maannakkut qinersisoqarnissaa pisariaqarluinnarpoq

- Inatsisartunut kommuninullu qineqqusaarnerit pilersaarusiornissaat apeqqutaapput. Taamaattumik taakku pilersaarutit pilersaarusiorneqarnissaat utaqqimaaqqaartariaqassavagut, soorunamilu peqataaffigalugit, Malik Berthelsen oqarpoq.

Paatsuungatitsisinnaasoq

Aamma Kommune Kujallermi borgmesteri, Kiista P. Isaksen (S) ugguarpoq.

- Kommunini sulilluni innuttaasunut toqqaannarnerujussuarmik attaveqarnerusoqartarpoq. Taamaattumik pingaarutilerujussuartut akisussaafferujussuartullu qinikkatut sulininni isigisarpara. Taamaammat Inatsisartut piffissaq taanna eqqoqqissaarlugu aamma qineqqusaartitsinerat ingerlasussanngormat initunerunissaa ernumassutigaara, Kiista P. Isaksen oqarpoq.

AAMMA ATUARUK Ulloq aalajangerneqarpoq: Apriilip ulluisa arfernat qinersissaagut

Inatsisartunut qineqqusaartut kommuninit akisussaaffigineqartunik aperineqarsinnaasartut, Inatsisartunullu qineqqusaartut kommuninit akisussaaffigineqartunut aperineqarsinnaasartut oqaatigaa. Maannakkullu paatsuungasoqarnerusoqarsinnaanissaa ernummatigaa.

Marlunnilli qinersinerit kikkut qanoq akisussaaffeqarnersut erseqqissisissinnaagaat, Kiista P. Isaksen ilanngullugu oqarpoq.

Apriilip ulluisa arferngat aamma nunaqarfinni aqutsisunut ilagiillu sinniisaannut qinersiffiussaaq.