Borgmesterit kommunaldirektørillu ilisimasaqarnerulerusupput

Borgmesterit 14-it kommunaldirektørillu EU pillugu ilisimaqarnerulerusupput. Taamaammat maannakkorpiaq Bruxellesimiipput – EU-mi allaffissornerujussuaq pillugu oqalugiarfigitillutik. Danmarkip Kalaallit Nunaatalu sinniisoqarfiat pulaarneqarpoq. Tassani sinniisuutitap, Lars Vesterbirkip, Nunatta tungaaniit EU-mi maanna suut suliarinerai ilisimatitsissutigaa. Puisit amii pillugit niuerneq ilaatigut maanna suliat ilagaat.

Borgmesterit danskit kalaalillu EU-mi suleqatigiinnerat pillugu sinniisuutitamit Ole Samsingimit oqalugiarfigineqassapput – ilaatigut EU-p nunat EU-p avataaniittunik suleqateqarnera pillugu aamma EU-p arfanniarneq pillugu malittareqqusaanik paasissutissiineqassaaq.

EU-mi ineriartorneq pillugu aningaasaateqarfiit qinnuteqarfiusinnaasut fondit qanimut paasiniaavigineqassapput.

Danmarkimi kommunit kattuffiisa aamma Islandimi kommunit kattuffiisa allaffeqarfii pulaarneqassapputtaaq. Borgmesterit Københavnimut aqagu unnukkut utissapput.