Borgmesterit innersuussutaat Naalakkersuisut tusaanianngippallaaqaat
Kommunit iluarsartuuteqqinneranni borgmesterit innersuussutaat naalakkersuisut tusaanianngippallaarpaat. Taamaammat borgmesterit naalakkersuisunut inatsisartunullu ammasumik maanna allagaqarput, iluarsartuusseqqinnerup atuutilersinneqarnissaa ukiumik ataatsimik kinguartinneqassasoq.
Borgmesterit tamarmiusut oqaaseqartitaat, Qaqortup borgmesteri, Simon Simonsen, ima oqarpoq:
-Tunngavilersuutit pingaarnerpaartaat taarusutarput una erseqqissaatigerusupparput una: Tassalu maannakkut killiffigisami nalilersuisimanerit aallaavigalugit Inatsisartuni oqaluuserisasanngortitsisimanermi, ippassaani uagutsinnut saqqummiunneqartumi, takusinnaagatsigu apeqqutit assigiinngitsorparujussuit uagutsinnut suli akissutissarsiffigineqarsimanngitsut, taamaammat taanna aallaavigalugu maanna isummerpugut, naalakkersuisunut aamma inatsisartunut ammasumik allagaqarniarluta.Allakkami kissaatiginartipparput aaqqissuusseqqinnerup 2009-mi maajip ulluisa aallaqqaataanni atuutilernissaanik inissiisimaneq kinguartillugu januaarip ulluisa aallaqaataanni 2010-mi pisussanngorlugu inissinneqassasoq.
Sorpiaat peqqutaanersut Simon Simonsen aperineqarpoq, akivorlu:
- Siullermik oqaatigissavarput kommunit KANUKOKA-llu suleqatigiissitaliarisimasaata innersussutigisai - kiisalu isumaliutersuummut tunngassuteqartut - paasigatsigik, naalakkersuisut suleqatigiissitaanninngaaniit isiginiarneqarsimanngitsut, taakkualu najoqqutarineqarsimanngitsut amerlasoorujussuusut, isumaqarpugullu taanna aallaavigalugu taakku maannakkut piviusorsiortumik samineqassappata, taava piffissaq sivitsorneqartariaqarpoq, borgmesterit tamarmiusut oqaaseqartitaat, Simon Simonsen oqarpoq.
