Borgmesterit ataatsimiipput

marsip 02-at 2006 10:32

Borgmesterit kommunaldirektørillu ullup aappassaani kommunit aaqqissuussaaqqinnissaat pillugu ataatsimiinneranni sumiiffinni oqartussaaqataaneq sammineqarpoq.

Borgmesterit eqimattakkaarlutik oqallisereerneranni oqallisigisimasatik saqqummiuppaat, tassanilu erserpoq borgmesterit ernummatigigaat kommunit komuunerujussuanngortinneqarpata sumiiffinni oqartussaaqataanerup annikillerujussuarnissaa. Arlallit saqqummiinerminni oqarput, aaqqissuussaaqqinnerup imarisai allat sammivallaarsimagamikkit sumiiffinni oqartussaaqataaneq kommunini eqqartorpiarneqarsimanngitsut.

Sumiiffinni oqartussaaqataanerup taamaaginnarnissaat anguniarlugit, borgmesterit arlalinnik siunnersuuteqarput, ilaatigut sumiffiit tamarmik kommunalbestyrelsimi issiatitaqartarnissaat inatsisitigut anguniarneqassasoq, qinerseriaaseq allanngortinneqassasoq, imaluunniit sumiiffiit tamarmik sinniisoqassasut imaluunniit aallartitaqassasut.

Borgmesterit saqqummeereermata summiiffinni oqartussaaqataaneq pillugu ippassaq saqqummiunneqartut oqaaseqarfigineqarput.

Syddansk Universitetimi lektori Ulrik Kjær akissuteqarluni oqarpoq, sumiiffinni oqartussaaqataanerup taamaaginnarnissaa anguniarlugu inatsisitigut aaqqiisoqarsinnaasoq. Sumiiffiit tamarmik kommunalbestyrelsiulertussani qinikkanik issiatitaqartarsinnaalersillugit, tamannali eqqarsaatigilluaqqaartariaqartoq oqarpoq, nunaqarfiit kommunalbestyrelsini amerlanerussuteqalersinnaanerinik kinguneqarsinnaammat.

Sumiiffinni oqartussaaqataaneq pillugu oqallinneq ullup qeqqata tungaanut ingerlanneqarpoq, ualerulu ilaatigut aaqqissuusseqqinnerup piffissaliunneqarnera eqqartorneqassalluni.