Borgmesterit ataatsimiipput

Borgmesterit kommunaldirektørillu Nuummi Hotel Hans Egede-mi ataatsimiinnissaat ullumi aqagulu ingerlanneqassaaq, pisortat suliassaqarfiinik aaqqissuusseqqinnissaq pillugu Aaqqissuussaanermut Isumalioqatigiissitat isumaliutissiissutaa ataatsimiinnermi oqallisigineqassalluni.

Ataatsimiinneq ulluni marlunni ingerlanneqartussaq kommuneqarfiit kattuffiata KANUKOKA-p aaqqissuussaraa, peqataasussallu aaqqissuusseqqinneq pillugu assigiinngitsunik saqqummiussiffigineqassapput.

Pingaarnertut eqqartorneqassapput Namminersornerullutik Oqartussanit suliassat sorliit kommuninut nuutinneqassanersut, nuutinneqarnerilu qanoq akeqassanersut.

Kommunit allippata, nunaqarfinnilu siulersuisuunerit ullumikkutut isikkoqarnerat atorunnaarsinneqarpat, sumiiffinni assigiinngitsuni oqartussaaqataaneq qanoq attatiinnarneqarsinnaanersoq, peqataasussat piffissaq annertooq atorlugu aamma eqqartussavaat.

Kiisalu aaqqissuusseqqinneq qaqugu atulersinneqassanersoq eqqartorneqassaaq, tassa kommunit qaqugu piariissanersut eqqartorneqassalluni.