Borgmesterit ataatsimiinnerat aallartippoq
Borgmesterit, kommunini pisortat atorfillillu katillugit 40-t missaanniittut Aalborgimi ataatsimiilernerat ullumi aallartiinnaqaaq.
Pisortat suliassaqarfiinik aaqqissuussseqqinnissaq pillugu isumaliutissiissut ataatsimiinnermi pingaarnertut oqaluuserineqarpoq.
Kommunit sisamaannaassanersut, kommunalbestyrelsimilu ilaasortat 17-ussanersut, iluarsartuussisoqareerpat inatsisartuni ilaasortat qassiussanersut, KANUKOKA-lu ingerlaannassanersoq eqqartorneqaleruttortunut ilaapput.
Aaqqissuussaanermut isumalioqatigiissitat isumaliutissiissutaat oqaluuserineqalermat borgmesterit oqariatuutaasa ilagivaat, isumaliutissiissutigineqartut piviusunngortinnissaannut piffissarititaasoq sivitsorneqartariaqartoq - innuttaasut isumaat tusarniarneqaqqaartariaqarsorineqarmata.
Borgmesterit kommininilu pisortat ataatsimiinneranni Naalakkersuisut siulittaasorigallagaat Hans Enoksen aamma aningaasaqarnermut naalakkersuisuugallartoq Josef Motzfeldt peqataapput.
