Borgmesterit annilaanngatigaat kommunit akiliisussanngoqinammata
Kommunit 18-nit sisamaannanngortinneqarpata kia akilissavaa? Borgmesterit annilaanngatigaat kommunit akiliisussanngornissaat:
-Uani saqqummiunneqartuni aningaasarpassuit taakkartorneqarput, aammalu nuutinneqartussat assigiinngitsorpassuit taakkartorneqarlutik. Taamaattumik taakkua ilumut qulakkeerneqarnersut apeqquserpagut, imaalillugit ilumut qulaakkerneqassappat taakkua aningaasarpassuit taakkartorneqartut? Maniitsup borgmesteria Søren Lyberth ataatsimiinnermi aningaasat pillugit apeqqusiigaangami ersaattaanneqarluartartoq aperivoq. KANUKOKA-p kommunit aaqqissuussaaqqinnissaanni ataatsimiisitsineranni ulluni marlunni ingerlanneqartussami, Søren Lyberthip isuma saqqummiussaa borgmesterit isummaminnik saqqummiigaangata aamma saqqummiunneqarajuttarpoq. Aaqqissuussaaqqinnissami siunnersuutigineqartuni kommunit namminersornerullutik oqartussanit akisussaaffinnik arlalippassuarnik tigusisussaapput, borgmesterilli aningaasat malinnaanissaat suli qularaat. Nukissiuteqarneq Kommunit tigusassaannut ilaavoq, Søren Lyberth-illu assersuutigaa aningaasanik tassani equngasumik agguaasoqarsinnaanera:
-Soorlu assersuutigiinnarlugu nukissiuteqarneq eqqarsaatigalugu, Nuummi nukissiuummik pilersitsinikuupput inuiaqatigiit annertuumik akiligaannik. Taava aamma qulakkiissavarput nukissiutit sinerissamiittut eqqarsaatigalugit aamma taamatut kusanartigisunngortillugit kommuninut tunniunneqarnissaat? Tassa tamakku eqqarsaatigalugit apeqquserparput ilumut taamaaliortoqarniarnersoq, aamma sanaartugassat allat eqqarsaatigalugit, Søren Lyberth oqarpoq.
Aaqqissuussaanermut Isumalioqatigiissitami ilaasortaq Namminersornerullutillu Oqartussani aningaasaqarnermut pisortaq Peter Beck isumaqarpoq aningaasaqarnertaa eqqartussallugu siusippallaartoq:
-Apeqqutit pingaarnerit tassaapput kommunit aaqqissuussaaqqinnerat siunissami qanoq isikkoqassanersoq, kommunillu suliassat suut tigussaneraat. Taakkulu inissinneqareerpata isumaga malillugu ajornannginnerussaq kommunit aningaasalersorneqarnisssaat qanoq isikkoqassanersoq inissititissallugu. Isumaqarpungalu borgmesterit eqqissisarsinnaassallugit oqarlunga aallaqqaataaniilli aalajangerneqarnikuummat suliassat kommuninut nuutinneqarpata aningaasartuutitai aamma malinnaasussaammata, Peter Beck oqarpoq.
Maniitsoq, kommunit allat assigalugit naalakkersuisunut innersuussuteqarnikuuvoq, aalajangiinernik allanik aalajangiisoqartinnagu, aaqqissuussaaqqinnermi aningaasaqarneq peqqissaarullugu misissorneqartariaqartariaqartoq. Siunnersuummi pineqartut allat aamma taamatut piumasaqarfigivaat, soorlu kommunit mittarfinnik ingerlatsinerat nunaqarfinnilu siulersuisuunerit atorunnaarsinneqarneranni.