Borgmesterit angalaqatigiit

Inatsisartuni ilaasortat arfinillit, borgmesteriutigisut, kommunit kattunnissaasa inatsisartuni eqqartorneqarnissaaniit Bruxelles-iliarumanerupput. Sermitsiaq ullumi saqqummersoq taama allappoq.

Inatsisartut ataatsimiinnerat marsip ulluisa qulingiluaanni aallartippat 2009-mi kommunit kattussuunneqarnissaat pillugu Naalakkersuisut siulittaasuat Hans Enoksen inatsisartut aalajangiiffigisassaannik saqqummiussissaaq.

Kommunerujussuanngortussanut ikaarsaariarnermi ataatsimiititaliaasusssanik 2008-mi qinersinissaq pillugu inatsisartut aalajangiisussaapput.

Borgmesterinilli tusarnaartoqaraniluunniit inatsisartut ataatsimiittarfianiittoqassanngilaq.

Borgmesterimmi 18-iusut tamarmik kommunit kattuffiata KANUKOKA-p siulersuisui sulisullu ilaat ilagalugit ullormi saqqummiussisussaaffiusumi EU-mi illoqarfiit pingaarnersaannut Bruxellesimut ingerlaassapput.

Angalasussat katillutik 45-ssapput, ullunilu arfinilinni angalassallutik. Sermitsiap paasisai naapertorlugit borgmesterit arfinillit, inatsisartunilu ilaasortaajutigisut, ulluni taakkunani inatsisartunit sulinngiffeqarallarnissaminnik qinnuteqaateqarsimapput, akuerineqarsimallutillu.

Borgmesterit kommunaldirektørillu juullilersoq Københavnimi ataatsimiimmata, EU-mut paasisassarsiorniarluni marsip ulluisa aqqarnanni aqqaneq-aappaannilu angalasoqarnissaa aalajangiunneqarpoq.

Ulluni taakkunani Bruxellesimiissinnaajumallutik tallimanngornikkut marsip ulluisa qulingiluaanni aallartariaqassapput. Sermitsiaq ullumi saqqummersoq allappoq.