Borgmesterit 14-it kinguartitseqqusipput

Allattoq Jaaku Lyberth
marsip 29-at 2007 13:26

Naalakkersuisut siulittaasuat, Hans Enoksen, borgmesterinit illuatungilerneqarpoq.

Borgmesterit 18-iusunit 14-nit piumasaraat, kommuninik aaqqissuusseqqinnissaq, naalakkersuisut naapertorlugit 2009-mi januaarip aallaqqaataani atuutilersussaq, ukiumik ataatsimik kinguartinneqartariaqartoq, januaarip 2010-mi aallaqqaataani atuutilertussanngorlugu.

’Kommuninik iluarsaaqqinnissaq tamatta isumaqatigaarput kisianni aaqqissuusseqqinnissamik siunnersuut peqqissaarullugu misissoqqittariaqarparput. Neriorsuutigineqartutut sipaarutissatut aallaaviit allanngorput. Inatsisartunut ilaasortat borgmesterillu Augusta Salling aamma Anthon Frederiksen Qaqortumi borgmesteri, Simon Simonsen, peqatigalugu Itisiliinermi ippassaq unnukkut taama oqarput.

Simon Simonsen-ip assersuutigalugu eqqaavaa, sipaarutissatut siornatigut neriorsuutigineqartunit 220 millioner koruuninit 130 millioner koruuninit, sipaarutigineqarsinnaajunnaartut.

- Apeqqutit akineqanngitsut misissorluartariaqakkavut amerlavallaaqaat, Simon Simonsen oqarpoq.

Inatsisartunut ilaasortap aamma borgmesteriusup, Jens Lars Fleischer-ip, Uummannami kommunalbestyrelsimi isummertoqartinnagu allaanerusumik isummernianngilaq.

Kommuninik aaqqissuusseqqinnerup siunertaasa ilagaat, kommunnit maanna 18-iusut kommunerujussuanngorlugit sisamaannanngortinneqarnissaat.