Borgmesterissaq nalornissutaasoq

Tage Frederiksen borgmesteritut tunuareersorlu Siumumeersup Kristine Raahaugep Nanortallip kommuneani borgmesterinngornissaa Demokraatit tungaanniit nalorninarsisinneqarpoq.

Kristine Raahaugep borgmesteritut ivertinneqarnissaa Siumukkut IA-kullu isumaqatigiillutik akuersaaraluarpaat, tamannali unioqqutitsinerussasoq Demokraatit isumaqarput.

Demokraatit siulittaasuat, Peter Borg, aamma borgmesterip sinniisussaata aappaattut inissisimasoq kommunalbestyrelsep inatsisai atuaqqissaarsimavai. Najoqqutassallu ima nassuiarpai, borgmesteri tunuarpat, sinniisussaq siulleq borgmesterinngussaaq. Nanortalimmilu borgmesterip sinniissussaa siulleq tassaavoq Debora Kleist, IA-meersoq.

Sinniisussap aappaa aamma siuariartussaavoq, taamaalillunilu Peter Borg tassaalissagaluarluni ateq nutaaq.

Demokraatit IA-kkut pisut pillugit attaveqarfigereerpaat. Peter Borg naapertorlugu, IA-kkut isumaqataapput, Siumukkullu ullumi nalunaarfigineqassapput.