Borgmesterip qinersisartut qallattorniarpai

- Soorunami ajuusaarutigaara tamaannga killittoqarsimanera, tassami neriuutigisimagaluaratsigu kattussuunnerup kingunerisaanik aamma maani Narsami innuttaasunik sullissineq pissusissamisut tamakkiisumillu ingerlanneqalissasoq. Kisiannili nalunngilarput sunaluunniit aaqqissuussaq annertoorujussuaq ingerlanneqaraagat tamanna imaaliallaannaq aaqqinneqarsinnaanngitsoq, Kommune kujallermi borgmesteri Simon Simonsen oqarpoq.

Nunatsinni kommunerujussuit sisamaasut atorunnaarsinneqarlutik illoqarfiit ataasiakkaarlutik kommuneqarfinngoqqinnissaat siunertaralugu, Narsami innuttaasut atsiortitsinernik katersipput. Tamatumunngalu siliuniuteqartut ilaata, Josef Petersenip tunngavilersuutaanut ilaavoq, kommunit kattussuunnerisa kingorna innuttaasunut sullissinerup ajorseriarsimanera, ilaatigut oqaatigalugu Narsarmiut kommunimut saaffiginniffissaarutipajaarsimasut.

Kommunimut saaffiginnittarfiit pitsaajunnaarsimaneri borgemesterip isertuutinngilaa.

- Piffissaq una aggersoq neriuutigeqaara, taamatut allanngortiterinerit ingerlatsinerillu ingerlareersut aallaavigalugit, innuttaasunut sullissinermik pitsaanerusumik aammalu naammagisimaarnartumik angusaqarsinnaassalluta, tamannalu anguneqarsinnaavoq oqaloqatigiinnikkut, borgmester Simon Simonsen oqarpoq.

Narsami innuttaasunut ajornartorsiutaasunut ilaavoq, kommunalbestyrelsemut ilaasortaq Narsamiit qinigaasoq ataasiinnaaq illoqarfimmini najugaqarmat, naak Narsarmiut marluk qinigaallutik ilaasortanngornikuugaluartut. Tamannalu inuit najugarisaanni oqartussaaqataanermut annikillisaataasoq Josef Petersenip oqaatigaa.

- Aamma neriuutigaara, qinigaaqatigiilluta oqalliseqatigiinnitta kingunerisaanik aaqqiissutinik nassaarsinnaassalluta aammalu qinigaaffiup matuma sinnerani Narsami qinikkamik innuttaasut oqaloqateqarsinnaanerat anguneqarsinnaanera maanna sulissutigaarput, Simon Simonsen oqarpoq.

Taanna atorfilittani ilagalugit ullumi Narsamiippoq, tassanilu innuttaasut piumasut oqaloqatigalugit. Borgmsterillu tupiginngilaa, oqaloqatigiinnerni suliffissaaleqineq pingaarnertut oqariartuutigineqarmat.

- Tamannalu tupinnanngilaq tassami Narsami suliffissaaleqineq annertoorujussuuvoq aammalu aaqqiissutissanik ujartuinissaq pisariaqalivissimalluni, Simon Simonsen oqarpoq.

Kommunerujussuit sisamaasut atorunnaarsillugit 18-nngorteqqinneqaqqinnissaat borgmesterip kingusinaareernerarpaa.

- Kattunneq pereernikuuvoq taamaattuaannarnissaali allaqqunneqarsinnaagunanngilaq, Kommune Kujallermi borgmsteri Simon Simonsen taama oqarpoq.

Tulliani kommunalbestyrelsep ataatsimiilinnginnarani, februaarip 29-anni Narsami pisussami, ulloq ataaseq atorlugu kommunalbestyrelsemi ilaasortat oqaloqatigiissutigissavaat, kommunip aaqqissuussaanera qanoq pitsanngorsarneqarsinnaanersoq.