Borgmesterip pisuutitsinerit qatsulluinnaramigit akissuteqarfigerusunngilai

Qaanaap borgmesteriata Johanne Nielsenip politikkikkut malersorneqarnini qatsulluinnarpaa, tarnikkullu ilungersuatinneqarpallaarnini pillugu eqqissisimarusunneruvoq.

Qaanaap borgmesteria taamaatittussanngoraluartoq Qaanaap kommuniata aningaasarliorneranut suli sakkortuumik pisuutinneqarpoq. Qaanaami kommunalbestyrelsemi ilaasortaq viceborgmesterimullu tullersortaasoq Niels Qujaukitsoq ulloqeqqanut radio aviisimut ima oqarpoq:

- Johanne Nielsenip kommunalbestyrelsemut nassuerutigaa tarnimigut sanngiitsuunini tunngavigalugu kommune inummik sanngiitsumik aqunneqaqqunagu tunuarniuteqarluni. Taamaattumik inuttut malersugaalluni oqarnera tunngavissaqanngilaq, Niels Qujaukitsoq oqarpoq.

Johanne Nielsenili radio aviisimut ima oqarpoq:

- Niels Qujaukitsup tarnikkut sanngiinnerarlunga oqaaseqarnera akissuteqarfigerusunngilara. Oqarsinnaavungali massakkorpiaq sakkortuumik tarnikkut ilungersuatsinneqarama. Sapilerpakka taamaattumillu ilaquttakkalu eqqissisimaannarusulerpugut, Johanne Nielsen oqarpoq.

Ulloqeqqanut radio aviisimut Niels Qujaukitsoq aamma oqarpoq, Johanne Nielsenip qitornami qinngasaarneqartarsimanerat politiinut suliassanngortiinnarsimasinnaagaluaraa:

- Inuttut malersuinerit pigaluttuinnartikkumanagit politiinut tunniussisimanngilanga, Johanne Nielsen oqarpoq.

Taamatuttaaq erseqqissaavoq nammineq pilluni avammut tusarliussinerit qatsulluinnaramigit, imminut pisuutitsinerit akissuteqarfigeqqikkusunngilluinnarini:

- Eqqissillunga oqarsinnaavunga malersuinerit qatsulluinnarakkit, qatsuppakka uannut ornigunnatik inuit akornanni oqallinnerit. Massakkorpiarlu kiserliorlunga misigeqaanga, oqarpoq.

Jannuaarip 31-ianni Qaanaami kommunalbestyrelse ataatsimiinnerani Johanne Nielsen borgmesteritut taamaatippat kia taarsissaneraa aalajangiunneqarpoq. Johanne Nielsenip borgmesteritut soraaruni sulerissanerluni massakkorpiaq nalugallarpaa, radio aviisimulli oqaatigisinnaanerarpaa illoqarfimmut allamut qinnuteqarsimagami.