Suliaq Nunatta Eqqartuussiviani qaqugu suliarineqassanersoq suli ilisimaneqanngilaq. Assi toqqorsivimmit.Assi: KNR

Borgmesterinngulersoq hashilerisutut pasineqarluni Nunatta Eqqartuussiviani suliassaasoq

Avannaata Kommuniani borgmesterinngulersoq qinersinissamut sapaatit akunneri marluinnanngortut, Eqqartuussisoqarfik Sermersuumi pinngitsuutitaavoq. Unnerluussut, unnerluussisussaatitaasut Nunatta eqqartuussivianut ingerlateqqikkaat, unnerluussisuunerup Morten Nielsenip uppernarsarpaa.

Avannaata Kommuniani borgmesterinngulersoq, Minik Høegh-Dam (S), ikiaroornartut pillugit inatsimmik unioqqutitsisimasutut Eqqartuussisoqarfik Sermersuumi marsip 25-ani unnerluunneqarpoq.

Aggustip 24-ani 2018-imi Minik Høegh-Dam-ip inaata ujarlerfiginerani, politiit aningaasat 154.805 koruunit nalingi nassaaraat. Taakkunannga 151.900 koruunit qilertanngortinneqarsimasut isarussat puuiniittut nassaaraat, 2.905 koruunillu aningaasiviani nassaaralugit.

Taamaammat tusarliupparput

KNR unnerluutigineqartut pinngitsuutitat pillugit tusarliussaqarneq ajoraluarpoq.

Unnerluunneqartullu ukiumit ataatsimit sivikinnerusumik pineqaatissinneqarsimasunut inissiisarfimmiittussanngortitat aqqi aamma saqqummiunneq ajoraluarpai.

Minik Høegh-Damili pillugu suliaq immikkut ippoq. Minik Høegh-Dam Avannaata Kommuniani borgmesteriulissaaq. Taamaammat suliaq borgmesterinngorlaamut tunngasoq tamanut saqqummiuttariaqarluinnartoq, KNR isumaqarpoq. 

Minik Høegh-Dam Eqqartuussisoqarfik Sermersuumi unnerluunneqarnermini pinngitsuutinneqarsimasoq tusagassiuinermi ileqqussat naapertorlugit tusarliutinngilarput.

Unnerluussisussaatitaasulli suliaq taanna Nunatta Eqqartuussivianut suliassanngorteqqippaat – Minik Høegh-Damilu borgmesteriulissalluni. 

Taamaammat tamanna tamanut saqqummiunneqartariaqartoq, KNR isumaqarpoq. 

Politiit isumaqarput aningaasat taakku, hashimik 300 grammimit minnerunngitsumit tuniniaanikkut, allatulluunniit inatsisinik unioqqutitsinikkut pissarsiarneqarsimasut. Tamanna allakkami unnerluutiginnissummi allassimavoq.

Unnerluussisussaatitaasut Nunatta Eqqartuussivianut suliassanngorteqqikkaat

Unnerluussisut piumasaraat unnerluunneqartoq ulluni 40-ni pineqaatissinneqarsimanut inissiivimmiittussanngortinneqassasoq, taannalu eqqartuussut pinerluuteqaqqinnermi aatsaat atuuttussaatitaassasoq piumasarineqarpoq. Taassuma saniatigut unnerluunneqartoq 15.000 koruuninik akiligassitsissasoq piumasaraat, kiisalu aningaasanik 153.805 koruuninik arsaarinnissuteqartoqassasoq, unnerluunneqartorlu suliap ingerlanerani akiligassanik akiliissasoq aamma piumasaralugu.

AAMMA ATUARUK Minik Høegh-Dam Avannaata Kommuniani borgmesterinngortoq

Illersuisup unnerluussap pinngitsuutinneqarnissaa piumasaraa, uppernarsaatillu amigarineqarmata unnerluunneqartoq Eqqartuussisoqarfik Sermersuumi pinngitsuutinneqarmat, unnerluussisut Nunatta Eqqartuussivianut ingerlatitseqqiinissamik aalajangerput.

- Ingerlatitseqqiivugut isumaqaratta suliaq Nunatta eqqartuussiviani aalajangerneqartariaqartoq. Maannalu taamaaliorpugut, pisumullu atatillugu oqaaseqaqqissinnaanngilanga, unnerluussisuuneq Morten Nielsen oqarpoq. 

Nunatta illersuisuunera, Finn Meinel, suliami illersuisutut inissisimavoq. Taassumalu naatsorsuutigaa suliaq Nunatta Eqqartuussiviani, Eqqartuusisoqarfik Sermersuumisulli inernilerneqassasoq.

- Sullitara Eqqartuussisoqarfik Sermersuumi pinngitsuutinneqarpoq, tamannalu Nunatta Eqqartuussiviani aamma pissasoq naatsorsuutigaara.

Minik Høegh-Damip nalunngilaa suliaq Nunatta Eqqartuussivianut ingerlateqqinneqartoq?  

-  Aap, nalunngilaa.

Qanoq isummerfigaa?

- Pinngitsuunerarpoq. Eqqartuussisoqarfik Sermersuumi pinngitsuunerarneqarpoq, tamannalu aamma Nunatta Eqqartuussiviani pissasoq naatsorsuutigaarput.

Suliaq Nunatta Eqqartuussiviani qaqugu suliarineqassanersoq suli ilisimaneqanngilaq. 

Minik Høegh-Dam oqaaseqartinniaraluarparput iluatsinngitsumik.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat