Borgmesterinngortussat siulersuisuini ilaasortanngorusupput
Kommuningortussani sisamaasuni borgmesterit KANUKOKA-p siulersuisuini siunissami ilaasortaasinnaassanersut, oqaluuserisassani soqutigineqarnerpaat ilagaat. Borgmesterinngortussat sisamaasut aperigaanni taakkua siulersuisuni ilaasortaanissartik soqutigilluinnarpaat. Qeqqata kommunissaani Ikaarsaariarnermi ataatsimiititaliap siulittaasua Hermann Berthelsen, Radioaviisimut ilaatigut ima oqarpoq:
- Borgmesterit KANUKOKA-p siulersuisuini ilaasortaassappata, taava KANUKOKA-mi siulersuisunngortut kommunini pissutsinik ilisimasaqarluartunik ilaqassapput. Tamatuma peqatigisaanik kommunit Namminersornerullutik Oqartussanut naalakkersuinikkut sunniuteqarsinnaanerussapput, tamannalumi pisariaqartinneqarpoq, Hermann Berthelsen oqarpoq.
Taamaattumik Ikaarsaariarnermi ataatsimiititaliat sisamaasut siulittaasui sinnerlugit, borgmesterinngortussat sisamaasut KANUKOKA-p siulersuisuini ilaasortaanissaat taassuma siunnersuutigaa. Taamaattorli borgmesterit siulersuisuni qanoq inissisimanissaat annerusumik oqaaseqarfigerusunngilaa.
- Borgmesterit alaatsinaattutut taasisinnaatitaanatik ilaasortaasinnaapput imaluunniit siulersuisuni nalinginnaasumik ilaasortaasinnaallutik, kingullerlu taaneqartoq pilerigineruarput, Hermann Berthelsen oqarpoq.
Borgmesterinngortussat sisamaasut Hermann Berthelsenip saniatigut tassaapput Jess Svane, Asii Chemnitz Narup aamma Simon Simonsen.
Borgmesterinngortussat KANUKOKA-mi siulersuisuni ilaasortaassanersut aallartitat ataatsimiineranni ullumi aallartittussami aqagumullu ingerlanneqartussami aalajangiiffigineqassaaq.
