Borgmesterimut allattaasimasoq borgmesterinngortoq

Kommuneqarfik Sermersuumi borgmesterinngortoq ilisarisimaneqarpallaanngilaq.

Asii Chemnitz Narup (IA) nunatsinni kommunit anginersaanni ukiuni qulini borgmesterioreerluni marlunngormat tunuarpoq. 

Kommunip ilaatigut Tasiilami akisussaaffigisai sapaatit akunnerini arlalinni isornartorsiorneqareersut taama pisoqarpoq. Meeqqat pingasuugaangata ataatsip kinguaassiutitigut atornerlugaasimanera meeqqallu marluugaangata aappaata isumaginnittoqarfimmut suliassanngortinneqarsimanera Danmarkip Radioata piviusulersaarutaani nalunaarusianilu arlalinni oqaluttuarineqarput.

Asii Chemnitz Narup kommunalbestyrelsip marlunngormat ataatsimiinnerani borgmesteritut tunuarpoq: Charlotte Ludvigsenilu, aamma Inuit Ataqatigiinneersoq, kommunillu Suliffeqarnermut Isumaginninnermullu ataatsimiititaani siulittaasuusimasoq borgmesterinngortinneqarpoq.

Charlotte Ludvigsen 2017-imi kommunimut qinersisoqarmat 77-iinnarnit taaguunneqarpoq. Taamaammat borgmesterinngortoq kinaanersoq paasisaqarfigiumallugu KNR-imit oqaloqatigaarput.

 

Ateq: Charlotte Ludvigsen.
Ukiut: 32-t.

Charlotte Ludvigsen Charlotte Ludvigsen

Ilinniakkat:
- Allaffimmi fuldmægtigitut ilinniagaqarpunga, aamma AU-mik ilinniagaqarpunga, global- og privatøkonomimik taaguuteqartoq. Meerartaarnera pissutigalugu ilinniarnertuunngorniarnera naammassinngilara.

Siunnersuisoqatigiit arlallit ilaasortaaffiginikuuakka – soorlu elevrådi klubrådilu, aamma Inuit Ataqatigiinni aaqqissuussaanermut allatsitut sulinikuuvunga. Tamatuma kingorna borgmesterip allattaatut 2013-imit 2014-imut aamma sulivunga.

AAMMA ATUARUK Charlotte Ludvigsen Kommuneqarfik Sermersuumi borgmesterinngortoq

Naalagaaffiup Sinniisoqarfiani ukiuni sisamani – ippassaq tikillugu – naatsorsuuserinermut akisussaasutut sulivunga.

Charlotte Ludvigsen 2015-imiilli kommunalbestyrelsimut ilaasortanngorpoq, aamma Suliffeqarnermut Isumaginninnermullu ataatsimiititami siulittaasuusimavoq.

Tunuliaqutarisat:
Nuummi inunngorpunga peroriartorlungalu. Illoqarfimmi allami najugaqarnikuunngilanga. Peroriartornera eqqarsaatigissagaanni oqartoqarsinnaavoq ileqqunik allannguisuusunga. Ataatannit ilaquttakka aalisartukkormiuullutillu piniartukkormiuupput. Ilaquttanni arlallit maanna ilinniagaqarput, inooriaatsimilli allannguinermut tunngatillugu aamma ileqqunik allannguisuuvunga. Tamannalu meeraaninniilli anguniagarivara.

AAMMA ATUARUK Asii Chemnitz Narup  trækker sig som borgmester

Aneqarpunga uannit ukiunik arfinilinnik angajulleq, taanna Savalimmiuni najugaqarpoq.

Charlotte Ludvigsenip ernini Aputsiaq najugaqartigaa.

Suna ilisarnaatigiviuk?

Immaqa oqaluukkuminartuaannartuunera, aamma angusassamik toraagaqartuuvunga politikkimillu oqallinneq nuannarisupilussuullugu.

Sunngiffimmi soqutigisat?

Politikki.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat