Borgmesterimit neriorsuut: Kofoed Skole Ilulissani ammassaaq
Ilulissani inersimasut atugarliornerpaat ornissinnaasaat amerlanerussapput.
Avannaata Kommuniani borgmesteri, Palle Jeremiassen (S) taama neriorsuuteqarpoq.
Taassuma taamaammat Nuummi Kofoed Skolep forstanderia, Gudmundur ”Gujo” Thorsteinsson Ilulissani immikkoortortamik ammaanissamik isumaqatigiissuteqarfigaa.
- Isumaginninnikkut sullitat inersimasut atugarliornerpaat suliffeqarfinnit sulisorineqarusunnginnermikkut pakatsisinneqartuartarnerat isumaginnninnikkut sullissisut sulinerminni siumortuarpaat. Maannalu alloriaqqinnikkut imminnut ikiorsersinnaalersillugit ikiorsiinialerpugut, Palle Jeremiassen tusagassiuutinut nalunaarummi allappoq.
AAMMA ATUARUK Ilulissani angerlarsimaffeqanngitsut unnuisarfissaat ullumi ammarpoq
Taama nalunaaruteqartoqarnera Gudmundur ”Gujo” Thorsteinssonip nuannaarutigaa.
- Inuit inuunerminnik ingerlariaqqinnissaannik inuunerissaarnissaanullu pitsanngorsaanissamut ikiuisoqarsinnaanissaa pingaarnerpaavoq, forstanderi KNR-imut oqarpoq.
Kofoed Skole
Kofoeds Skole Københavnimi 1928-mi pilersinneqarpoq.
Kofoed Skole Nuummi 2015-imi ammarpoq. Suliffeqarfik imminut ingerlatippoq ingerlatsinermullu Kommuneqarfik Sermersuumit tapiissuteqarfigineqartarluni.
Inersimasut atugarliortut tassunga iserlutik, sulliivinni sulisinnaapput, atuartitsinermi peqataasinnaapput imminullu ikiorsernissamut ikiorneqarsinnaallutik.
Atuarfimmi atuartut sulinerminnut atisanik, nerisassanik, eroorsinermik ulluinnarnilu pisariaqartitanik allanik akilerneqartarput.
Paasissutissarsiffik: menneskermedmere.dk
Billede: Gudmundur "Gujo" Thorsteinsson, forstander i Kofoed skole i Nuuk.
Thorstensson kommunimi oqaloqateqariartorluni nunatsinni illoqarfiit annerpaat pingajuannut tikeraaqqammerpoq.
Innuttaasunit qanoq amerlatigisunit Kofoed Skoletut ittumik tassa iserluni sullivinni sulisinnaanissaq aamma atuartitsinermut imminullu ikiorsersinnaalernissamut ikiorneqarnissamut pisariaqartitsineq qanoq annertutiginersoq aamma paasiniarpaa.
- Pisariaqartitsineq ersarittuaannanngilaq. Maani illoqarfimmi aamma takusinnaavarput. Ammaanerup kingorna piffissap ingerlanerani takkuttoqartarpoq. Qanoq amerlatigisut pisariaqartitsinersut allassimasuutigineqanngilaq. Tamannali paasiartulerparput.
Aatsaat qinersisoqareerpat
Gudmundur ”Gujo” Thorsteinssonip atuarfimmik nutaamik aallartisaanissamut ikiuiartornissani nassuiaatigaa, taannali llulissanit ingerlanneqassaaq.
- Atuarfeqalernerani sammisassat nammineq inissikkumaarpout. Soorlu maani aallartikkatta. Atuarfiup qanoq ilusilersornissaa ilisimasimanngilarput. Illumik tunineqaannarpugut, tassanngaanniillu aallartippugut.
AAMMA ATUARUK Kofoeds Skole Kunngissakkut isumaginninnikkut nersornaasiuttagaannik nersorneqartoq
Ilulissalli Kofoed Skoleqalissanersoq kommunimut apriilip arfernani qinersinermi aalajangerneqassaaq.
Borgmester Palle Jeremiassenimmi inaarutaasumik aalajangiinissaq qinersisoqareernerani aatsaat piumaartoq tusagassiuutinut nalunaarummi oqaatigaa.
- Avannaata Kommunia, Ilulissat aamma politikkikkut susassaqarfinnilu suliaqartut qanoq qaqugulu pissanersoq aalajangissavaat.
