Borgmesterimiit oqalutsitut

Borgmesterip issiavianiit Inatsisartuni oqalutsitut. Qaanaap borgmestererisimasaa Johanne Nielsen Nuummut nuuppoq Inatsisartunilu oqalutsitut maanna sulivoq. Oqalutsit allaffiata silataani Johanne Nielsen malersugaasimanerminit aniguisimaaqisoq radioaviisimiit naapipparput.

- Februaarip ingerlanerani aalajangersimavunga Qaanaaq qimakkallarniarlugu, taamaalilluta ilaquttakka oqaloqatigereerlugit maanga nuuppugut. Tikikkamalu ingerlaannarlunga nutserisoqarfimmut qinnuteqaqattaarpunga, taamaalillunga maani sulilerpunga, Johanne Nielsen oqaluttuarpoq.

Taanna unnersiorpoq massakkut inuunertik assorsuaq nuannersisimasoq.

- Meerartarput nuannaarluni atuariartortalerpoq uagullu tamatta suliffeqalerluta tamanna siumut ingerlariarneruvoq, oqarpoq.

Aperaarput borgmesteritut tunuarnini peqqissimissutigineraa.

- Peqqissimissutiginngilara aamma illuatungaatigut oqarsinnaavunga taamatut sulisimanera aamma peqqissimissutissaqarfiginngilara, oqarpoq nangipporlu:

- Sumiluunniit politikkikkut sulinermi taamatut pisoqarsinnaasarpoq taannalu uanga siumut eqqarsaatigivallaarsimanngilara sanngiiffigivallaatsiarsimavara sakkortunaarpallaarsimallugulu, Johanne Nielsen oqarpoq.

Inatsisartut oqaluttarfianni oqaaseqartunut toqqaannartumik nutserisut katillutik pingasuupput.