Borgmesteri utaqqikatappoq
- Naalakkersuisoq allaffissornikkut akuleruttariaqalerpoq, Borgmester Jess Svane oqarpoq
Ilulissani sanaartornermi sulisitsisut suliassaaleqineq peqqutigalugu sulisunit 200-nit 140-t maannamut angerlartittariaqarsimavaat.
Ilulissani sulisitsisut peqatigiiffiata allakkani ammasuni politikerit iliuuseqaqqullugit nalunaaruteqareerput, tassami sanaartorneq unittooqqasoq ajornartorsiutaalermat. Maannalu Qaasuitsup kommunia borgmesteri akuersaarumajunnaarpoq.
- Killiffipput akueriinnarsinnaajunnaarparput. Qiviarneqartariaqalerpugut ukua sanaartugassat aningaasaleriikkagut aallartinneqartariaqarmata, Borgmesteri Jess Svane Ineqarnermut naalakkersuisoq Jens B. Frederiksen allaffissornikkut akuliutequllugu taama oqarpoq.
Namminersorlutik Oqartussat aamma Qaasuitsup kommuniata siorna isumaqatigiissutigaat aningaasaleeqatigiinnikkut utoqqaat illui marluk aamma puigortunngortut immikkkoortortaqarfissaat sanaartorneqassasut. Sanaartornerilli suli aallartinneqanngillat, Namminersorlutik Oqartussani suli atsiortoqanngimmat.
- Attaviginninnigut ilungersortumik piuarsimappat, atsioreerpata, soorunami, suliassat aallartissinnaaniassagatsigit. Aningaasalersorneralu aallartillugu. Ippassaq aamma nalunaarfigitippugut inatsisartut aningaasaqarnermut ataatsimiititaliaat juunip 29-ani ataatsimiippat qaqinneqassasut taakkua. Pissutsit taamatut ingerlarusaarsimapput ajoraluartumik. Namminersorlutik Oqartussat allaffissornikkut taamatut ingerlatsinera akuerisinnaanngilarput, Jess Svane isornartorsiuilluni oqarpoq.
Sanaartornissamut pilersaarutigineqartut aallartissappata Naalakkersuisunut ilaasortaq Jens B. Frederiksen allaffissornikkut arriitsumik ingerlatsisoqarneranut akuleruttariaqalersoq, Borgmester Jess Svane isumaqarpoq.
- Isumaqarpunga Naalakkersuisut Namminersorlutik Oqartussani allaffissornerup ingerlaasia paasiniartariaqaleraat, Borgmester Jess Svane oqarpoq.
Ineqarnermut, Attaveqarnermut Angallannermullu Naalakkersuisoq Jens B. Frederiksen suliamut tunngatillugu Qanoruumi unnugu apersorneqassammat.