Borgmesteri uranimik tuniniaarusuppoq

- Kuannersuit pisuussutaasa piiarneqarnissaanni inuit pinngortitarluunniit avatangiiseq ajoquserneqassanngillat. Taama erseqqissaavoq Kommune Kujallermi borgmesteri Simon Simonsen.

Taassuma aamma erseqqissarpaa aatsitassanik qalluinermi uranip pinngitsoorani malinnaasussap qanoq pineqarnissaa pillugu naalakkersuinermik suliaqartut namminneq aalajangiissasut.

Uranip sinneruttup qanoq pineqarnissaa pillugu borgmesteri aamma nammineq isummersuuteqarpoq.

- Tamanit pitsaanerpaassagunarpoq nukissamik pilersitsiniarnermi pitsaasunik siunertaqarluni tuniniarsinnaagaanni, nunanilu tamalaani atomip nukissiuutaaneranut nakkutilliisut aalajangersakkamik iluanni immaqa nunarsuarmi sumiluunniit nunanut tatigineqarsinnaasunut tuniniarsinnaavaat,

Simon Simonsen oqarpoq.

Nunani tamalaani atomip nukissiuutaaneranut nakkutilliisut FN-ip ataani immikkoortortaapput, uranillu isumannaatsumik atorneqarnissaa suliassaralugu. Nakkutilliisut aqqutigalugit tuniniaanermi urani nunami allami atomimik nukissiorfimmi CO2-mik mingutsitsinngitsumik nukissiuutitut atorneqartussanngorlugu suliarineqartarpoq. Nuna taanna taamaalilluni tunisassiat sinnikuisa qinngornernik ulorianartortallit isumannaatsumik toqqortarinissaannut pisussaaffilerneqartarpoq.

Taamaakkaluartoq Narsami peqatigiiffik uranimut akerliusoq taamatut aaqqiissuteqarnissamut akerliulluinnarpoq. Siulittaasoq Kalistat Lund oqarpoq:

- Nunarsuarmi sumiluunniit uranip avatangiisinut ajoqutaanngilluinnartumik iluaqutigineqartarnera atuarsimanaguluunniit siumorsimanngilara, pinngortitamik mingutsitsinngitsumik oqalunneq killormut saatitsiniaaneruvoq, Kalistat Lund oqarpoq.