Borgmesteri siunertaqanngitsumik angalanerarneqartoq
Nikolaj Heinrich, kommunip angalatitaanut katillugit arfiniliusunut siuttuulluni, Nuup Kommuniata illoqarfitut ikinngutigisaanut, Illoqqortoormiunut, ippassaq ullaakkut aallarpoq. Angalanerli siunertaqanngilaq, kommunillu aningaasaataanik asuli atuinerulluni, kommunimmi januaarimi kattuttussaapput. Isornartorsiuineq ilaatigut taama nipaqarpoq.
Kommunip aningaasaatai hornoruju tusindtit arlaqartut atorlugit taamatut ”angalanermut siunertaqanngitsumut” atorneqarnissaat Nuummi kommunalbestyrelsimi Inuit Ataqatigiit sinnerlugit ilaasortap, Ove Karl Berthelsenip, Sermitsiami isornartorsiorpaa.
Nikolaj Heinrich angalanermini Illoqqortoormiuni pissutsinik paasiniaaniarpoq, kommunit kattunnissaat piareersarniarlugu.
-Kisianni Nuup Kommunia januaarip ulluisa aallaqqaataanni atorunnaartussaavoq, Nikolaj Heinrichilu borgmesteriujunnaartussaalluni, Ove Karl Berthelsen oqarpoq.
