Borgmesteri pisuuvoq
Tasiilami kommunalbestyrelsemi ilaasortat amerlanerussuteqartut Atassutaapput Siumukkunneersumilli borgmesteriutitsipput.
Tasiilami kommunalbestyrelsemi borgmesterimut tullersorti Atassummeersoq Thomas Kristensen oqarpoq, Tasiilap aningaasatigut ajutoornera borgmesterip Vittus Mikaelsenip siumungaaq isiginnginnerujussuanik peqquteqartoq taamatuttaaq innuttaasut eqeersimaannginnerujussuanik peqquteqartoq.
- 2005-imi qinigaagamali aningaasaqarnerput taamaaginnangajappoq, Taamani kommunemut iserama kommuni aningaasaqanngilaq, tassa taamanili taamatut ajortigaaq. Kisianni akilersinnaasat akilertarpaat, Thomas Kristensen oqarpoq.
Taanna erseqqissaavoq, massakkut aningaasaqarneq ajoraluaqisoq taamani iserami suli ajornerujussuusimasoq massakkullu immaaraannannguaq ajunnginnerulaalersimalluni.
Thomas Kristensen aperaarput kommuni sipaarniarmat sutigut sipaarniuteqarsimanersut.
- Kontot tamaasa misissuivigaavut, tamaasa tigusiffigisarlugit sipaarfigaavut, soorlu kommunip allattoqarfia, IT område sipaarfigaavut, kommunip entreprenør afdelingia aamma sipaarfigineqarpoq. Allaalluunniit peqatigiiffiit sipaarniarfigilerpavut soorlu aamma timersortartut peqatigiiffiat, Thomas Kristensen oqarpoq.
Taanna aperaarput inuusuttut susassaqartinneqarnissaannut tunngasut kommune-p aamma sipaarniarfigimmagit ulorianarsorinnginneraa inuusuttut susassaarukkunik inunnut isumaginninnermut tunngasut aamma qaffattariaqalersinnaanerat.’
- Maani peqatigiiffiit ukiorpassuit ingerlaneranni eqiinganngippallaarujussuarput, peqatigiiffinniit kommune isumalluutigineqarpallaarpoq. Namminneerlutik aningaasanik pissarsiniarlutik ilungersuuteqartarsinnaagaluarput soorlu fond-inut qinnuteqartarlutik soorluttaaq kitaani aamma peqatigiiffiit taamaattartut. Peqatigiiffiit pimoorussilluarlutik ilaasortaaffigisaminnut tunniusimanerujussuusinnaagaluarput, taamaalilluni kommunep aningaasaqarnera ikorfartorsinnaagaluarpaat, Thomas Kristensen oqarpoq.
Taama oqarpoq Tasiilami borgmesterimut tullersorti Thomas Kristensen.
Taanna aamma oqarpoq Tasiilami inuussutissarsiuteqannginnera, soorlu aalisakkerivinnik assigisaannillu peqannginnera kommunip amigartoorneranut peqqutaaqataalluinnartoq.
