Borgmesteri parteeqamminit isornartorsiorneqarpoq
Borgmesterip kingullertigut Upernavik Seafood - taassumalu pisortaa sapaatip-akunnerani kingullermi sakkortuumik isornartorsiorpai, suliffeqarfillu taama ittoq suliffigiumaneqarsinnaanersoq apeqquserlugu.
Suliffeqarfinnut pissuseq taama ittoq unitsilluinnartariaqartoq borgmesterip tullia Jess Svane isumaqarpoq:
-Uanga qinikkatut oqariartorsinnaanngilanga oqarlunga una suliffeqarfik kia suliartorfigissagamiuk taama ajortigisoq. Taama torinngitsigisumik oqariartorfigisaqattaassagutsigit suliffeqarfiit kikkut Qaasuitsup Kommuunianik nakerinnissagamik.
Borgmester Ole Dorph sapaatip-akunnerani kingullermi oqarpoq Upernavik Seafoodip sulisussaaleqisarnera sulisitsisulunnermik suliffeqarfittullu pilerinanngitsuuneranik peqquteqartoq.
-Avannaata aviisiani Tamanut-mi atuarneqarsinnaasutut Upernavik Seafoodip innuttaasunut akerartortutut pigunit suliffik taamaattoq taava kia inuup suliffigiumassallugu soqutigissavaa? Borgmester Ole Dorpgh sapaatip-akunnerani kingullermi ilaatigut taama oqarpoq.
Nipi taamaattoq suleqatiginnikkusunnertut nipeqanngimmat unitsinneqarluinnartariaqartoq, tassungalu taarsiullugu torersumik pissuseqarluni ingerlatsisoqartariaqarnera borgmesterimut kissaatigissallugu borgmesterip tullia Jess Svane oqarpoq:
-Borgmesterip peqatigissagaatigut kissaatigaarput, suliffeqarfiit kikkuugaluartulluunnit torersumik oqaloqatigalugit ingerlatsinissarput pillugu. Ajortoqaraangat suliffeqarfik soorunami unneqqarissumik toqqaannartumillu oqarfigissavarput, massakkutut avataaninngaannit atorsinnaanngitsutut oqariartorfigisaqattaarineq atorsinnaanngitsoq pinnagu.