- Tassa ilinniutit annerpaartarivaat - paasivarput Qeqqata Kommuniani - taamatut nunami ikuallattoqartillugu pumpit mikivallaarlutillu sakkukippallaartut, Qeqqata Kommuniani borgmester Malik Berthelsen oqarpoq.

Borgmesteri: Nunap ikuallannera ilikkagaqarfigaarput

Sismiut avannaanni Kangerluarsuk Tullermi nunap ikuallannera Qeqqata Kommuniani upalungaarsimanermut suliaqartunut arlalitsigut ilinniarfiuvoq.

Qeqqatalu Kommuniata borgmesteriata, Kommune Qeqertalimmi borgmesterip, nuna tamakkerlugu pinngortitami ikuallattoqarnerani upalungaarsimasoqalernissaanut kissaateqarnera isumaqatigaa.

Kangerluarsuk Tullermi nuna qaammat sinnerlugu ikuallangaatsiarpoq.

Tamannalu upalungaarsimanikkut unammillernarlunilu ilinniutaalluarsimasoq, Qeqqata Kommuniani borgmester Malik Berthelsen oqarpoq:

- Tassa ilinniutit annerpaartarivaat - paasivarput Qeqqata Kommuniani - taamatut nunami ikuallattoqartillugu pumpit mikivallaarlutillu sakkukippallaartut.

Naalakkersuinikkut suliniut

Kommune Qeqertallip borgmesteriata, Ane Hansenip, nuna tamakkerlugu pinngortitami ikuallattoqarnerani upalungaarsimasoqalernissaata naalakkersuinikkut suliniutiginissaanik oqariartuutaa Malik Berthelsenip isumaqatigaa:

- Ingammik silaannaap kianneruleriartornera eqqarsaatigalugu aammalu assersuutigalugu Sisimiut Kangerlussuullu akornanni nuna angallaffiusoq annertusigaluttuinnartillugu, taava naatsorsuutigisinnaavarput immaqa aamma suli siunissami nunamik ikuallattumik naammattuuisarnissarput.

AAMMA ATUARUK Pinngortitami ikuallannernut upalungaarsimaneq ataatsimoorullugu suliarineqartariaqarpoq

Nunap ikuallannerani imermut milluaatit asimi angallakkuminarnersiorlugit Qeqqata Kommuniani upalungaarsimasunit pisiarineqarnikuusimapput.

- Kisianni tassa paasivarput massakkut mikivallaartut naleqqutinngitsullu nunami ikuallattumi atussallugit, Malik Berthelsen oqarpoq.

Qeqqata Kommunia nunami ikuallattoqartillugu nunamut kapputtakkanik imerterilluni qamisaatigineqarsinnaasunik sisamanik peqareerluni, Kangerluarsuk Tullermi nuna ikuallalermat, 30-nik sanatitseqqippoq.

- Nuna taamatut ikuallatsillugu innerup nunap iluani ingerlasarnera - aamma immikkut ilisimasalinninngaannit Danmarkimit oqaatigineqarpoq - allaat ukiuni 20-ni nunap iluani ikumasoq ingerlasinnaasoq. Taamaattumik taakkua sanatinneqarput nunap iluani ikuallattup qamissinnaanissaa anguniarlugu.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat