Borgmesteri nuannaartoq
Maniitsup kommunia 2.800-jut missaannik inoqarpoq, aluminiumimillu aatsitsivissap 3.000-it missaannik sulisoqarnissaa naatsorsuutigineqarluni.
Søren Lyberthip illoqarfiup siunissaa pissanganarluinnartutut isigaa.
Aluminiumik aatsitsivissaq Maniitsup, kommunerujussuanngortussalluunniit kisimi iluaqutigissanngilaa, Kalaallilli Nunaata tamarmi iluaqutigissavaa, taamatut naalakkersuisunut ilaasortaq, Siverth K. Heilmann tusagassiortunut saqqummiinermini ullumi oqarpoq. Erseqqissarluguli aluminiuliorfiliortoqassanersoq inatsisartut aatsaat 2009-mi aalajangiiffigisussaammassuk.
Aluminiuliorfiliortoqassappalli naalakkersuisut siunersuutigaat Maniitsup avannamut kangisinnerusortaani, Kangerlummi, Maniitsumiit kilometerinik aqqanilinnik ungasitsigisumi inissinneqassasoq.
Aluminiuliorfissap sumiinnissaata nalilersorniarnerani nunatat piniarfiusartut eqqissisimatittariaqakkallu kisimik eqqarsaatigineqaratik aammali talittarfiliorfiusinnaasut alliliisoqarnissaanullu periarfissat aamma pingaartinneqarsimapput. Aluminiuliorfissaq Sisimiuniitinneqassagaluarpat Nuummiitinneqassagaluarpalluunniit kallerup innerata aqqusiornissaa takinerujussuusariaqassaagaluarpoq, taamaalillunilu akitsorsaataaginnarani aamma nunarujussuaq aqqutigineqartussaassammat Maniitsumiinnissaa siunnersuutigineqarpoq.
