Assi: Kommuneqarfik Sermersooq

Borgmesteri nakkutilliisunut unnerluutigineqartoq

Borgmester Asii Chemnitz Narupip Kommuneqarfik Sermersuumilu kommunalbestyrelsemi Siumut-gruppeata akornanni oqattoqalerpoq.

Nuummi Siorarsiorfimmut pilersaarusiaq Kommunalbestyrelsemi Siumumit ilaasortat akuerseqataaneratigut akuerineqartoq tamatumani peqqutaavoq. Isumaalli maanna illuatungaanut saassimalerpoq.

Siumumiit Ane Egede Mathæussen Peter Davidsenilu ammasumik allagaqarlutik byrådit borgmesterimit salloqittagaasimanerarpaat.

- Borgmester Asii Chemnitz Narup (IA) kommunalbestyrelsimi ilaasortanut kommunillu innuttaanut saqqummiussinermini, Siorarsiorfik pillugu, suliniut pilersaarusiarlu 4-5 mia. Kr.-inik nalilik ingerlallualereersutut saqqummiuppaa, maannali piviusoq taamaanngitsoq paasinarsivoq. Kommunalbestyrelsemut ilaasortat marluk ammasumik taama allagaqarput.

AAMMA ATUARUK Kielsenip isornartorsiuinera Siumup politikkerinngilaa

Pasilliinerit eqqunnginnerarai

Taakkuli paasissutissiinerlussimanermut pasilliinertik tunuartissinnaagaat borgmesterip oqaatigaa.

- Suliassaq sukumiilluinnartumik kommunalbestyrelsimi suliarineqarsimavoq, ilaasortallu 19-iusut tamarmik, taasisitsinerit tamaasa, akuerseqataallutik taaseqataasarsimapput. Suliap aallartinneranili Ane Egede Mathæussen politikkikkut aqutsisoqatigiinnut ilaavoq, paasissutissallu uanga pissarsiarisartakkama asserluinnaanik paasissutissinneqartarluni, Asii Chemnitz Narup Sermitsiaq.AG-mut oqarpoq.

AAMMA ATUARUK Kielsenip Asii parteeqatinilu isornartorsiorai

Nakkutilliisunut tunniunneqartoq

Siumumit ilaasortat marluk borgmesterimut pasilliinermi saniatigut borgmesteri neqeroortitsinissamut malittarisassanik unioqqutitsisimanerarpaat, tassanilu Siorarsiorfimmut pilersaarusiornermut atatillugu kommuni suliassat neqeroortitsissutigeqqaarnagu danskit siunnersorteqarfianut millionit koruunit sinnerlugit akiliisimanerarpaat.

Suliassaq suliffeqarfiup ataasiinnaap suliarisinnaagaa illersuutigineqarnikuuvoq, ilisimatuulli Sermitsiamut taamaannginnerarpaa. Ane Egede Mathæussenip Peter Davidsenillu tamanna tunuliaqutaralugu Asii Chemnitz Narup nakkutilliisunut tunniuppaat, nakkutilliisullu neqeroortitseqqaarnissamik malittarisassat unioqqutinneqarsimanersut maanna aalajangertussanngorpaat.

Taama pasilliuteqarneq borgmesterip aamma Sermitsiaq.AG-mut eqqunnginnerarpaa.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat