Borgmesteri: Kommuneqatigiilerutta tamatta nammaqatigiittussaavugut

- Avammut nalunaarutigineqartuni oqaatigineqarpoq Ilulissat kommuneata kommuneqatissamik akiitsorsui nammattussanngormagit Ilulissani innuttaasunut allaat atukkatigut ajorseriartitsitsissasoq. Taamaanngilaq, Jess Svane oqarpoq.

- Kangaatsiaminngaanniit Qaanaaq ilanngullugu kommuniulertussat akiitsui katillutik 45 mio. koruuniupput. Tamavitta eqqaamasariaqarparput, Ilulissat kommuneata kisimi akiitsui 22-23 mio. koruuniummata. Kommuninngoruttalu Qaanaamiikkutta, Qasigiannguaniikkutta Qeqertarsuarmiikkuttaluunniit, taakku ilanngullugit nammattussaavagut, Borgmesteri oqarpoq.

Qinigaasimasullu ima oqarsinnaasariaqarnerarpai:

- Aap, taakku tamaviisa akisussaaqataaffiginiarlugit suleqataaffiginiarlugillu kommunerujussuanngortussanut ikkunnikuuvugut, Jess Svane erseqqissaavoq.

Jess Svanep erseqqissaatigaa ikaarsaariarnermut ataatsimiititaliap aningaasaqarnermut ataatsimiititaliaa oktobarip ulluisa aqqarnanni, ataatsimiilerpat kinguartitsinissamik oqariartuutit oqallisigitissagini.

Qaasuitsup Kommuneani illoqarfiit arfineq-pingasuussapput nunaqarfiillu 32-ussallutik, tassa inoqarfiit 40-t kommunerujussuanngussapput.