Borgmesteri: Kattuffimmik matusinerup assigiinnassavaa, kisermaassilluni naalakkersuineq.

-Kanukoka atorunnaarsinneqarpat, assigiinnarpaa oqartussaaqataanerup innarlerneqarnera. Taama oqarpoq Qaasuitsup kommuneata borgmesteria Jess Svane, Inatsisartunut ilaasortap Demokraatineersup, Niels Thomsenip allaaserisaanut qisuariarluni.
Allattoq Apollo Jeremiassen
februaarip 20-at 2010 17:05

-Kattuffimmik matuseqqusineq imaappoq, oqartussaaqataanerup aqqani ingerlanneqartumik piiaaneq, taamaaliornelu oqartussaaqataanermik piiaanerussaaq. Assigiinnarpaa kisermaassilluni naalakkersuineq. Qujanartumik Kalaallit Nunaanni kisermaassisoqanngilaq. Jess Svane oqarpoq.

2009-mi januaarip aallaqqaataani Kalaallit Nunaanni kommunit sisamaannanngortinneqarnerisa kingorna Kanukokap aningaasalersorneqarnera allanngortinneqarsimanngilaq. Qeqqata kommuneta borgmesteria, Hermann Berthelsen ippassaq Qanoruumut oqarpoq, ajoriffiassaqartinnagu Kanukokamut aningaasaliisutit ikilisinneqarpata, tamatumunnga Jess Svane isumaqataavoq.

- Hermann Berthelsen isumaqatigaara. Taamaattorli Kattuffiup nutarterneqarnerata suliarineqarnera utaqqineqartariaqassaaq. Massakkulli kattuffik atorfissaqartipparput, aammalumi atortorujussuullutigu. Kattuffik Naalakkersuisunut attaveqaatigaarput. Kattuffiullu suliaraa kommunit ataasiakkaat suliaannik artorsinneqannginnissaat. Qaasuitsup kommuneani borgmesteri, Jess Svane naggasiivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq