Borgmesteri: Inissaaleqineq alianarpoq

- Inissaaleqinerujussuup piliaanik ajornartorsiutit taamaattut pilertarput, aamma alianarnera oqaatigisinnaavara isertorusunngilara, Kommuneqarfimmi Sermersuumi borgmesteri Asii Chemnitz Narup oqarpoq.

Kommunalbestyrelsi suliuniutissaminnik pingaartitaminnik toqqartuimmat inissaaleqinerup anigornissaa aalajangerneqartoq, Asii Chemnitz Narup oqarpoq.

Tassalu siunissami ungasinnerusumi aatsaat naammassineqassapput, maannakkorpiarlu ajornartorsiortut qanoq iliorfigineqassappat?

- Tassa assigiinngitsunik inissaaleqinermik eqqorneqartumik immikkut ittumik suliniartoqareerpoq, Nuup Kommuniugallarmalli ingerlanneqarpoq, Asii Chemnitz Narup oqarpoq.

Angut napparsimareernermi kingorna Kommuneqarfik Sermersuumiit tupermik tunisippoq. Taannali kisimiinngilaq. Napparsimasoq alla Nuummut nuutsitaanermi kingorna tupermik aamma neqeroorfigineqarsimalluni KNR-imut oqaluttuarpoq.

Taamatut pineqarnerat inatsisinik maleruagassanilluunniit unioqqutitsinerunngitsoq, Namminersorlutik Oqartussani isumaginninnermut naalakkersuisoqarfimmi allaffimmi pisortap Kirsten Olesenip oqaatigereerpaa.

Tungiuinermullu allattoqarfiup maleruagassat amerlammata initaarnissamik neqerooruteqarnissaat killeqarput:

- Periarfissaasut killeqaqisut iluini sulineq ingerlavoq.

Tassa nassuerutigineqartariaqarpa inuit ilaat inissaannik innersuunneqarsinnaanngimmata?

- Oqaatigissavara sullissinerit inunnut ataasiakkaanut tunngassuteqartut oqaaseqarfigineq ajorakkit, Asii Chemnitz Narup oqarpoq.

Siunissaq ungasinnerusoq isigalugu inissaaleqineq akiornarlugu inissanik sanaartortoqarpoq, kisianni pitsaanerusumik kiffartuussisinnaanissartik neriorsuutigisinnaanagu, borgmesteri oqarpoq:

- Ukioq manna ukiunilu tulliuttuni sanaartorneqartut aallartereersut naammassineqassapput, taamaakkaluartorlu suli pisariaqartitsisoqarpoq malinnaaffiginiapiloornarlutillu, borgmesteri oqarpoq imatullu naggasiilluni:

- Tamakkiisumik imaaliallaannaq pitsaanerusumik kiffartuussisinnaanerput neriorsuutigisinnaanngilara.