Borgmesteri: Ineriartornissarput Namminersorlutik Oqartussat aporfilersorpaat

Nuuk nutserarfioqaq, illoqarfillu ukiortaami 18.800-inik inoqarpoq. Inuit 1913 -it kommunip inissiaatinik aqutsiviani inissarsiorput. Maannamullu borgmesteriusoq Charlotte Ludvigsen kikkut tamarmik inissaqarnissaat pingaarnerpaatut qineqqusaarutiginiarpaa.

- Kikkunnut tamanut inissialiornissaq. Kikkut tamarmik namminneq initaarnissaminnut akissaqanngillat. Taamaammat taanna pingaarnerpaatut inissisimavoq. Isumaqarpunga inuiaqatigiinni inuunerinnerulernissamut aaqqissuussaanerpullu eqqarsaatigalugu kivitsisinnaalluta angerlarsimaffiit toqqissisimaffiusut pilersinneqarneranni, Charlotte Ludvigsen KNR-imut oqarpoq.

Kommuneqarfik Sermersooq inissarsiortut inissaqartikkumallugit inissianik attartortitseqqiisarpoq.

Namminersorlutik Oqartussalli periaaseq taanna inatsisinut naapertuuttuunersoq apeqquserpaat, Kommuninillu Nakkutilliisoqarfimmut suliassanngortillugu.

AAMMA ATUARUK Kommunit Nakkutilliisoqarfiata Sermersooq inissianik attartortitseqqiisarunnaarallartikkaa

Tamannalu unammillernarnerpaasoq borgmesteri, Charlotte Ludvigsen naliliivoq.

- Kommunitsinni ukiuni arfinilinni tullerni inissiat 1850-it sanaartorneqarnissaannik anguniagaqarpugut. Tamannali maannakkut ingerlassinnaanngilarput, pissutigalugu inissiaqarnermut tunngasut pillugit Kommunit Nakkutilliisoqarfiannut tunniunneqarnikuugatta, Charlotte Ludvigsen oqarpoq.

Kommuninillu Nakkutilliisoqarfik aalajangiitinnagu Kommune inissianik 1850-inik sanaartorsinnaanngilaq, tamannalu ineriartornissamut aporfilersuinerusoq, borgmesteri isumaqarpoq.

Eqqartuussivilersuussisinnaasoq

Kommunip inissianik attartortitseqqiisarnera inatsisaattuliornerusoq periaatsinilu taanna unitsittariaqaraa, Kommuninik Nakkutilliisoqarfik aalajangiigaluarpat, borgmesteri qanoq iliornissaminik nalorninngilaq.

- Ingerlariaqqiffissap tullia tassaasussaassaaq eqqartuussivik. Inuttaasut inissaaleqisut uani pineqarput, anguniakkagut angussavagut, Charlotte Ludvigsen oqarpoq.

Taanna kommuninut 2017-imi qinersinermi 77-inik taaguunneqarpoq.

Kommunip inissiaatileqatigiiffiani Nuummi initaarnissamut agguaqatigiisillugu ukiuni aqqanilinni utaqqisoqartarpoq.